Üzeyir bəyin ev-muzeyində həsrət dolu görüş

Mayın 4-də Üzeyir Hacıbəylinin ev-muzeyində Şuşanın işğalının 20 ilinə həsr olunmuş “20 il Şuşasız” adlı tədbir keçirildi.

Tədbir iştirakçıları əvvəlcə muzeydə Üzeyir Hacıbəylinin büstü qarşısına tər çiçəklər düzüb zaldakı nadir eksponatlarla tanış oldular, Şuşa həyatını əks etdirən fotosərgiyə baxdılar. Həsrət dolu görüşü Ü.Hacıbəylinin ev-muzeyinin direktoru, Əməkdar incəsənət xadimi, bəstəkar Sərdar Fərəcov açaraq bildirdi ki, dahi bəstəkarın ev-muzeyi 40 ilə yaxındır ki, Bakıda fəaliyyət göstərir: “Buraya gələn ziyarətçilərin ilk eşitdikləri söz Şuşadır. Çünki dünya şöhrətli Üzeyir Hacıbəyli Şuşada boya-başa çatıb, onun əsərlərində Şuşa xatirələri də əksini tapıb. Bu gün dünyanı qarış-qarış gəzən “Arşın mal alan” məhz Şuşanın həyatını əks etdirən bir əsərdir. Bu gün ürəyimizdə Şuşa boyda bir nisgil daşıyırıq. Amma sabaha ümidimizi itirmirik. Arzu edək ki, Şuşasız yaşadığımız 20-ci il həsrətimizin, nisgilimizin, ayrılığımızın son ili olsun”.

Tədbirdə Şuşa Rayon İcra Hakimiyyətinin başçısı Bayram Səfərov, Xalq artisti Firəngiz Mütəllimova, Azərbaycan Yazıçılar Birliyinin Qarabağ bölməsinin sədri, ədəbiyyat üzrə fəlsəfə doktoru, şair Ənvər Əhməd, sənətşünaslıq üzrə fəlsəfə doktoru, dosent Məleykə Alıqızı, bəstəkar Rauf Əliyev, professor Aydın Dadaşov çıxış edərək, Şuşasız keçən 20 ilin kədərini, acı xatirələrini, nisgilini doğma məkanda - Üzeyir Hacıbəylinin ev-muzeyində Şuşa həsrətli insanlarla bölüşdülər. Ürəyinin hər döyüntüsü Şuşa deyən çıxışçılar həsrətdən ümidə yol getdilər, Qarabağın tacı olan Şuşaya qayıdacaqları günün ümidi ilə yaşadıqlarını, Üzeyir bəyin narahat ruhunun məhz Şuşa qaytarılan gün rahat olacağını bildirdilər.

Tədbirdə Mədəniyyət və İncəsənət Universitetinin ifaçılıq kafedrasının müdiri, dosent Gülağa Zeynalov (tar) və Leyla Əmirovanın (piano) ifasında Süleyman Ələsgərovun “Xəyala dalarkən” kompozisiyası təqdim olundu. Sərdar Fərəcovun “Qarabağ” əsəri səsləndirildi. Mədəniyyət və İncəsənət Universitetinin kütləvi tədbirlər və bayram rejissorluğu ixtisası üzrə IV kurs tələbələri Vəsilə Fətəliyeva, Surəya Əzizova, Əkbər Rüstəmov, İlqar Babayev, Tərvin Quliyeva, Məryəm Quliyevanın ifasında “Yaddan çıxmaz Qarabağ” adlı kompozisiya iştirakçılara həzin anlar yaşatdı.

İtirilmiş torpaqlarımızı anmaq üçün bu il sonuncu il olsun. Tədbir bu arzu ilə başa çatdı.

Təranə Vahid

Mədəniyyət.- 2012.- 9 may.- S. 6.