Abdulla Şaiqin ev-muzeyində
“Muzeylər gecəsi”
Görkəmli
bəstəkarlar Oqtay Zülfüqarov və Rəşid Şəfəqə
diplomlar təqdim olundu
Mayın 22-də Abdulla Şaiqin
ev-muzeyində “Muzeylər gecəsi” aksiyası çərçivəsində
tədbir keçirildi. Muzeyin direktoru Ülkər Talıbzadə
tədbirin mədəni xidmət işinin yenidən təşkili,
muzey işində yeniliklər devizi altında keçirildiyini
nəzərə çatdırdı. Bildirdi ki, Abdulla
Şaiqin şeirlərinə bəstələnmiş musiqi əsərlərinin
tədqiqi, nəşri və təqdimi, həmçinin musiqi
əsərlərini yazan bəstəkarlarla müştərək
əməkdaşlıq muzeyin reallaşdırdığı
yeniliklərdəndir: “Abdulla Şaiq görkəmli maarif xadimi
olmaqla yanaşı, uşaqlara həsr etdiyi şeirlərlə
də şöhrət qazanmışdır. Onun şeirləri
dilinin səlisliyi və rəvanlığı, dərin məzmunu,
bədii-ideya səviyyəsi ilə bəstəkarların diqqətini
cəlb etmiş, onların yaradıcılığı
üçün yararlı material olmuşdur. Buna görə
də şairin müxtəlif məzmunlu seirlərinə və
pyeslərinə yüksək ideya-emosional ruhlu musiqi əsərləri
bəstələnmişdir. Xalq artisti, bəstəkar Oqtay
Zülfüqarov Abdulla Şaiq irsinə sıx-sıx
müraciət edən bəstəkarlarımızdan biridir. O,
yaratdığı “Aysel” qrupu ilə birlikdə şairin
yaradıcılığı ilə əlaqədar
keçirilən tədbirlərdə dəfələrlə
bəstələdiyi musiqi nömrələri ilə
çıxışlar etmişdir. Abdulla Şaiqin irsinin təbliğ
olunmasında xüsusi xidmətləri olan şəxslərdən
biri də Əməkdar incəsənət xadimi, bəstəkar
Rəşid Şəfəqdir. 2011-ci ildə bəstəkarın
təşəbbüsü ilə “Abdulla Şaiqin sözlərinə
bəstələnmiş musiqi əsərləri” adlı not
kitabı işıq üzü görmüşdür.
Bütün bunları nəzərə alaraq şairin mənzil
muzeyinin rəhbərliyi A.Şaiq irsinin təbliğində
göstərdikləri xüsusi fəaliyyətə görə
Xalq artisti Oqtay Zülfüqarovu və bəstəkar Rəşid
Şəfəqi Abdulla Şaiq diplomu ilə təltif edir”.
Diplomla mükafatlandırılan bəstəkarlar
muzeyin rəhbərliyinə təşəkkürlərini
bildirdilər. A.Şaiqin onların
yaradıcılıqlarındakı rolundan söz
açdılar. Qeyd olundu ki, şairin əsərləri xalq
arasında, xüsusilə məktəblilər və gənclər
arasında həmişə böyük həvəslə dinlənilmişdir.
Bu musiqilər gənc nəsil və körpə balalar
üçün qiymətli hədiyyədir.
Sonra mərasim bəstəkarların
əsərlərindən ibarət konsert proqramı ilə
davam etdi. Gecədə Bakı Musiqi Akademiyasının, Azərbaycan
Dövlət Mədəniyyət və İncəsənət
Universitetinin, Asəf Zeynallı adına Musiqi Kollecinin müəllim
heyəti, tanınmış incəsənət xadimləri
iştirak edirdilər.
Mədəniyyət.-
2012.- 23 may.- S. 4.