Görkəmli
ədibin yubileyi qeyd olunub
Yeni
dərs ilində Azərbaycan Dövlət Mədəniyyət
və İncəsənət Universitetinin müxtəlif
mövzularda keçirdiyi tədbirlərin siyahısı
genişlənir.
Görkəmli Azərbaycan
yazıçısı, şair, dramaturq, publisist və ictimai
xadim Məmməd Səid Ordubadinin 140 illik yubileyinin qeyd edilməsi
də bu tədbirlər silsiləsinin yaddaqalan məqamlarından
biri oldu. Prezident İlham Əliyevin ədibin yubileyi ilə
bağlı 10 aprel 2012-ci il tarixli sərəncamına əsasən
respublika miqyasında müxtəlif mədəni-kütləvi
tədbirlər keçirilir. Əlbəttə ki, 90 illik
şərəfli tarixə malik ADMİU da bu prosesdə öz
sözünü deməliydi.
Oktyabrın 5-də universitetdə
keçirilən elmi konfransı giriş sözü ilə
açan Sənətşünaslıq fakültəsinin
dekanı, filologiya üzrə fəlsəfə doktoru Vəfa
Əliyev böyük yazıçının həyat və
fəaliyyəti barədə müfəssəl məlumat
verdi. Xalqımızın belə azman qələm sahibi olan sənətkarlarının
yubileyləri ilə əlaqədar Prezident İlham Əliyevin
imzaladığı sərəncamların tarixi əhəmiyyətini
qeyd edən Vəfa Əliyev ADMİU-da bu münasibətlə
elmi konfransların, mədəni-kütləvi tədbirlərin
yüksək səviyyədə təşkil olunduğunu
vurğuladı.
Universitetin tərbiyə və
humanitar işlər üzrə prorektoru, filologiya elmləri
doktoru, professor Gülşən Əliyeva-Kəngərlinin
“M.S.Ordubadi yaradıcılığı XX əsrin ədəbi-tarixi
prosesi kontekstində” adlı məruzəsi maraqla dinlənildi.
O, ədibin “Qılınc və qələm”, “Dumanlı Təbriz”,
“Döyüşən şəhər”, “Gizli Bakı”,
“Dünya dəyişir” kimi tarixi əsərlərinin ədəbi-bədii,
fəlsəfi-estetik mahiyyətini yığcam boyalarla şərh
etdi.
“Ədəbiyyat və Azərbaycan
dili” kafedrasının müdiri, sənətşünaslıq
üzrə fəlsəfə doktoru Gülnarə Məmmədova
“M.S.Ordubadinin ədəbi-tənqidi məqalələri”
mövzusunda məruzəsində Ordubadini həm də ədəbiyyatşünas
alim, görkəmli tənqidçi kimi səciyyələndirdi.
Sənətşünaslıq üzrə fəlsəfə
doktoru Məsməxanım Qubadova isə öz
çıxışını Azərbaycan teatr salnaməsinə
əvəzsiz töhfələr bəxş etmiş Ordubadinin
dramaturq kimi fəaliyyətinə həsr etdi.
Ədəbi yaradıcılıq
kafedrasının müdiri, filologiya elmləri doktoru, professor
Aqşin Babayev böyük ədiblə bağlı
eşitdiyi, şəxsən şahidi olduğu maraqlı hadisələri
təsvir etdikcə auditoriyada xüsusi bir ab-hava
yaranırdı. Elmi konfransın sonunda Sənətşünaslıq
fakültəsinin II kurs tələbələri Ayşənur
Əliyeva və Elnurə Novruzovanın Ordubadi ədəbi
irsindən təqdim etdikləri şeir nümunələri
alqışlarla qarşılandı.
İntiqam Mehdizadə
Mədəniyyət.-
2012.- 17 oktyabr.- S. 10.