“Mənim
tanrım gözəllikdir, sevgidir”
Səma
şairi Hüseyn Cavidin 130 illik yubileyi təntənə ilə
qeyd edildi
Oktyabrın 24-də Akademik Milli Dram Teatrında Mədəniyyət
və Turizm Nazirliyinin təşkilatçılığı
ilə görkəmli şair və dramaturq, ictimai xadim
Hüseyn Cavidin (Hüseyn Abdulla oğlu Rasizadə) 130 illiyinə
həsr olunmuş təntənəli yubiley mərasimi
keçirildi.
Yubiley gecəsində Azərbaycan
Respublikasının Baş naziri Artur Rasizadə, Baş nazirin
müavini, Xalq yazıçısı Elçin Əfəndiyev,
tanınmış mədəniyyət və incəsənət
xadimləri, görkəmli ziyalılar iştirak edirdilər.
Tədbir iştirakçıları əvvəlcə
teatrın foyesində Hüseyn Cavidin həyat və
yaradıcılığını əks etdirən fotoşərgi
ilə tanış oldular.
Mərasimi mədəniyyət və
turizm naziri Əbülfəs Qarayev açaraq Prezident İlham
Əliyevin “Hüseyn Cavidin 130 illik yubileyinin keçirilməsi
haqqında” 16 fevral 2012-ci il tarixli sərəncam
imzaladığını nəzərə
çatdırdı. Sərəncama əsasən, Mədəniyyət
və Turizm Nazirliyi Təhsil Nazirliyi, Azərbaycan Milli Elmlər
Akademiyası və Yazıçılar Birliyi ilə birlikdə
geniş tədbirlər planı hazırlayıb, Bakıda və
respublikanın bölgələrində müxtəlif tədbirlər
keçirilib.
Əbülfəs Qarayev görkəmli
şair-dramaturqun təntənəli yubiley mərasiminin Milli
Dram Teatrında təşkil olunmasının rəmzi məna
daşıdığını bildirdi: “Çünki onun əsərləri
zaman-zaman məhz bu səhnədə tamaşaya qoyulmuş,
insanların qəlbinə qəhrəmanlıq, humanizm, məhəbbət,
mərhəmət duyğuları bəxş etmişdir”.
Nazir Hüseyn Cavidin zəngin və
təkrarsız yaradıcılığından da ətraflı
söz açdı:
“Şeyx Sənan”, “İblis”, “Topal
Teymur”, “Peyğəmbər”, “Xəyyam”, “Səyavuş” kimi
dramları, “Azər” poeması, eyni zamanda yazdığı
lirik-fəlsəfi şeirləri Cavidin adını milli mədəniyyət
tarixinə əbədi olaraq həkk etmişdir. Bu əsərlərin
hər birində böyük sənətkar bəşəriyyəti
düşündürən ən vacib məsələlərə
toxunmuş, insanın dəyərindən, onun böyük
xariqələr yaratmaq imkanı varkən hansı həyat
ziddiyyətləri ilə üz-üzə
qaldığından ustalıqla bəhs etmişdir. Hüseyn
Cavid müsəlman Şərqində yazıb-yaradan bir
çox şairlərdən fərqli olaraq insanı dininə,
milliyyətinə və mənsub olduğu zümrəyə
görə deyil, düşüncəsinə, əməllərinə,
elminə və qabiliyyətinə görə dəyərləndirirdi.
O, obrazlı desək, məhəbbət dininə sitayiş
edir, mədəniyyət məbədinə tapınırdı”.
Nazir çıxışında
şair-dramaturqun Azərbaycan teatrının
inkişafındakı xidmətlərindən də
danışdı, Hüseyn Cavidin ədəbiyyatımızın
söz və fikir əsilzadəsi, Azərbaycanın
Şekspiri adlandırılmasının heç də təsadüf
olmadığını vurğuladı: “Cavidin dram əsərləri
sənətkarlıq baxımından yüksək ustalıqla
qələmə alınmışdır. Mənzum
dramaturgiyamızın banisi olan böyük qələm sahibi
yaratdığı obrazlar qalereyası və dərin xarakterlərlə,
eyni zamanda mövzu rəngarəngliyi ilə ədəbiyyatımızı
zənginləşdirmiş, dramaturgiyamızı qlobal məkana
istiqamətləndirə bilmişdir. Cavidin əsərləri
səhnəyə yeni bir nəfəs, yeni bir ruh gətirmiş,
milli teatr mədəniyyətinin inkişafına qüvvətli
təsir göstərmiş, mütəxəssislər tərəfindən
"Cavid teatrı" kimi səciyyələndirilmişdir”.
Böyük şair, böyük
dramaturq, böyük filosof və böyük müəllim
olan Hüseyn Cavid parlaq şəxsiyyəti, yüksək
ziyalı əxlaqı və kəşməkəşli taleyi
ilə bütün dövrlər üçün örnəkdir:
“Hüseyn Cavid 30-cu illər repressiyasının qurbanı
olmuşdur. Əsərləri qadağan edilmiş, kitabları
kitabxana rəflərindən qaldırılmışdır.
Ancaq sovet dövrünün bütün qadağalarına
baxmayaraq, Azərbaycan xalqı Cavidi, onun əsərlərini qəlbində
yaşatmışdır. Ölümündən sonra bəraət
alan şair ölməz əsərləri ilə yenidən
öz xalqının görüşünə gəlmişdir.
100 illik yubileyi ərəfəsində, 1982-ci ildə
ümummilli lider Heydər Əliyevin təşəbbüsü
və yaxından iştirakı ilə böyük şairin cənazəsinin
qalıqları İrkutsk vilayətindən Naxçıvana gətirilmiş,
ev-muzeyinin yaxınlığında dəfn edilmiş, qəbri
üstündə möhtəşəm məqbərə ucaldılmışdır.
Bu, böyük Cavidin Azərbaycana - idealları uğrunda
qurban getdiyi doğma məmləkətə həm də fiziki
qayıdışı idi. Ulu öndərimizin
atdığı cəsarətli addım sayəsində tarixi
ədalətsizliyə son qoyulmuş, onun narahat ruhu doğma vətənində
rahatlıq tapmışdır”.
Nazir görkəmli ədibin 130
illik yubileyinin yüksək səviyyədə keçirilməsini
dövlətimizin Cavid irsinə göstərdiyi böyük
qayğının təcəssümü kimi dəyərləndirdi.
Yubiley gecəsində
çıxış edən Azərbaycan
Yazıçılar Birliyinin sədri, Xalq
yazıçısı Anar insanların nadir hallarda 130 il
yaşadığını, Cavidə isə bu ömrün
yarısını da yaşamağa imkan verilmədiyini
bildirdi: “Yaradıcılığının qaynar
çağında onu vətənindən, ailəsindən
ayırdılar. Ölümündən sonra 20 il əsərləri
yasaq olunsa da, Cavid irsi yaddaşlarda, qəlblərdə
yaşadı”. Ümummilli lider Heydər Əliyevin
xalqımız qarşısında böyük xidmətləri
olduğunu deyən Xalq yazıçısı Hüseyn
Cavidin nəşinin vətənə qaytarılmasında ulu
öndərin əvəzsiz rolunu bir daha vurğuladı:
“Naxçıvanda Hüseyn Cavidin qəbri üstündə
möhtəşəm məqbərə ucaldıldı, indi
bu türbədə Cavidlə birlikdə onun vəfalı həyat
yoldaşı Müşkinaz xanım, mərd qızı Turan
xanım və faciəli tale yaşamış oğlu Ərtoğrul
uyuyur”.
Anar vaxtilə şairin peyğəmbərcəsinə
dediyi bu sözləri xatırladı: “Həyat onları
ayırdı, ölüm onları birləşdirdi.”
Yubiley gecəsində filologiya elmləri
doktoru, professor Nizaməddin Şəmsizadə
çıxış edərək Hüseyn Cavidin məşəqqətli
ömür yolundan və bütün zamanlar üçün
aktuallığını qoruyub saxlayan əsərlərinin
ideya-məzmun xüsusiyyətlərindən, şairin ədəbi
irsinə dövlət qayğısından və xalq sevgisindən
söhbət açdı: “Dünya romantizminin
qocaldığı bir vaxtda öz şah əsərləri ilə
Azərbaycan ədəbiyyatında romantizmin gözəl
nümunələrini yaradan Cavid ideal həqiqət axtara-axtara
yerdən uzaqlaşdı və səma şairi oldu. Hüseyn
Cavidin ideal həqiqəti eşq oldu. Onun şah əsəri
“Şeyx Sənan“ bu eşqin bariz nümunəsidir. “Mənim
tanrım, gözəllikdir, sevgidir” - fəlsəfəsi əslində
Hüseyn Cavid yaradıcılığına bir
açardır.
Azərbaycan ədəbiyyatına
mənzum dramaturgiyanı gətirən Cavid poeziya teatrı ilə
səhnənin bütün şablonlarını qıraraq
mücərrəd dillə danışmağa başladı”.
Mərasimdə dahi sənətkarın
fəlsəfi məzmuna malik olan və insanlığın
mahiyyətini açıb göstərən “İblis” faciəsindən
Arifin monoloqunu Xalq artisti Ramiz Məlik, qəzəllərini isə
Xalq artisti İlham Əsgərov ifa etdilər. Akademik Milli Dram
və Dövlət Gənc Tamaşaçılar
teatrlarının aktyorları böyük dramaturqun “Afət”
pyesindən, “Şeyx Sənan” faciəsindən parçalar təqdim
etdilər.
Yenilikçi ruhu ilə bərabər,
yaradıcılığında həmişə klassik ənənələrə
geniş yer verən dahi söz ustadının qəzəlləri
Xalq artisti, xanəndə Mənsum İbrahimovun ifasında gecəyə
xoş ovqat qatdı. Dramaturqun bəşəri ideyaları
özündə ehtiva edən “Şeyx Sənan”
tamaşasına böyük bəstəkar Fikrət Əmirovun
yazdığı “Kor ərəbin mahnısı” Xalq artisti
Alim Qasımovun ifasında təqdim edildi.
Yubiley gecəsində Azərbaycanın
ictimai fikir tarixində xüsusi yeri olan qüdrətli söz
sahibi, özünü “səma şairi” adlandıran Hüseyn
Cavidin ölməz əsərləri əsasında hazırlanmış
ədəbi-bədii kompozisiya da nümayiş olundu.
Təranə
Vahid
Mədəniyyət.-
2012.- 31 oktyabr.- S. 5.