Respublika Uşaq Kitabxanasının beynəlxalq əlaqələri genişlənir

F.Köçərli adına Respublika Uşaq Kitabxanası ölkəmizi Beynəlxalq Uşaq Kitabları Şurasının (İnternational Board on Books for Young People - İBBY) Londonda keçirilmiş 33-cü konqresində təmsil edib.

76 dövlətdən 500-dən çox nümayəndənin qatıldığı tədbirdə Respublika Uşaq Kitabxanasının elmi işlər üzrə direktor müavini Zahirə Dadaşova və incəsənət şöbəsinin müdiri İlahə Quliyeva iştirak ediblər.

Konqres çərçivəsində təşkil edilmiş sərgidə ingilis dilində Azərbaycan uşaq yazarlarının kitabları, kitabxananın təsis etdiyi “Göy qurşağı” jurnalının son nömrələri Azərbaycan bayrağı altında nümayiş olunub.

İki ildən bir keçirilən konqresin budəfəki mövzusu miqrasiya ilə bağlı olduğundan, buna uyğun olaraq yazıçı Qəşəm İsabəylinin “Sabahın xeyir, baba!” uşaq hekayəsi konqresin xüsusi buraxılmış kitabında (“Biz hamımız eyni böyük torpaqdanıq”) dərc olunub. Zahirə Dadaşovanın “Bizim İBBY-də ilk addımlarımız” məqaləsi isə “Bookbird” jurnalının sentyabr nömrəsində çap olunacaq.

F.Köçərli adına Respublika Uşaq Kitabxanasının nümayəndələri həmçinin “H.X.Anderson qızıl medalı” qaliblərinin təqdimat mərasimində də iştirak ediblər.

Mədəniyyət.- 2012.- 12 sentyabr.- S. 6.