“Miras”ın qiraət günü

Aprelin 3-də “Miras” Mədəni İrsin Öyrənilməsinə Kömək İctimai Birliyi (İB) Beynəlxalq Uşaq Kitabı Günü münasibətilə açıq havada qiraət təşkil edib.

Nizami Rayon Mərkəzləşdirilmiş Kitabxana Sistemi ilə əməkdaşlıq çərçivəsində təşkil olunan tədbirdə rayon ictimaiyyəti və məktəblilər iştirak ediblər.

Nizami rayonundakı Heydər Əliyev parkında “Miras” İB-nin çap məhsulları, üzvlərin əl işləri, eləcə də kitabxananın təqdim etdiyi müxtəlif uşaq kitabları, oxucu yaradıcılığının məhsulu olan rəsmlər və s. sərgilənib. Ziyarətçilər parkda kitab oxumaq, yeni nəşrlərlə tanış olmaq imkanı qazanıblar.

Qiraət gününün iştirakçıları həmçinin “Miras” İB-nin üzvü, ebru mütəxəssisi Vüsal Qaraqaşlının təqdimatında bu sənətin sirləri ilə tanış olublar.

Əsas məqsədi cəmiyyətin diqqətini uşaq ədəbiyyatına, onun problemlərinə və kitab mədəniyyətinə cəlb etmək olan bir neçə saatlıq tədbir zamanı insanların kitaba, rəsm sənətinə, əcnəbi dillərə marağı da nəzərə alınıb.

Xatırladaq ki, 1967-ci ildən başlayaraq Uşaq Kitabları üzrə Beynəlxalq Şuranın təşəbbüsü və qərarı ilə məşhur danimarkalı uşaq yazıçısı Hans Xristian Andersenin doğum günü olan 2 aprel dünyada Beynəlxalq Uşaq Kitabı Günü kimi qeyd edilir.

Mədəniyyət.- 2013.- 5 aprel.- S. 7.