“Azərbaycan mədəniyyəti” - bilik müsabiqəsi

Mədəniyyət və Turizm Nazirliyi Azərbaycan mədəniyyətinin tarixi və müasir nailiyyətləri barədə gənclərə biliklərin aşılanması, böyüməkdə olan nəslin mənəvi-estetik tərbiyəsinin gücləndirilməsi, ümummilli lider Heydər Əliyevin zəngin irsinin təbliğ edilməsi məqsədilə "Azərbaycan mədəniyyəti" mövzusunda uşaq musiqi və incəsənət məktəblərinin şagirdləri arasında respublika bilik müsabiqəsi keçirir.

Müsabiqə 3 turdan ibarət olmaqla, 12-16 yaşlı şagirdlər arasında keçirilir. İlk mərhələyə aprelin 3-də yekun vurulub. Şəhər və rayon mədəniyyət və turizm şöbələri tərəfindən yaradılan komissiya bilik yarışında növbəti turda iştirak edəcək şagirdləri müəyyənləşdirib.

Qeyd edək ki, müsabiqə Azərbaycan mədəniyyəti mövzusunda tərtib edilmiş suallar əsasında test üsulu ilə keçirilir. Nazirliyin Regionlarla iş sektorundan verilən məlumata görə, aprelin 8-də Xaçmazda (Quba, Qusar, Şabran, Siyəzən, Xaçmaz, Xızı, Qubadlı, Abşeron, Sumqayıt, Zəngilan, Şuşa), aprelin 9-da isə Şəmkirdə (Qazax, Ağstafa, Tovuz, Gədəbəy, Gəncə, Kəlbəcər, Daşkəsən, Şəmkir, Göygöl, Samux, Yevlax, Ucar) müsabiqənin zona turları gerçəkləşib. Ən yüksək nəticə göstərmiş şagirdlər yekun turda iştirak etmək hüququ qazanıblar. İkinci turun davamı aprelin 12-də İsmayıllı və Mingəçevirdə, 16-da Saatlı və 19-da Cəlilabadda keçiriləcək. Müsabiqəyə may ayında yekun vurulacaq. Qaliblər Mədəniyyət və Turizm Nazirliyinin qiymətli hədiyyələri və fəxri fərmanları ilə təltif olunacaq.

Ceyhun

Mədəniyyət.- 2013.- 10 aprel.- S. 3.