“Qarabağ” Macarıstanda ürəkləri fəth etdi

XIII Beynəlxalq mahnı və rəqs festivalında ansamblın çıxışı tamaşaçıların böyük rəğbətini qazanıb

Avqustun 5-dən 17-dək Macarıstanın Göngöş şəhərində keçirilən XIII Beynəlxalq mahnı və rəqs festivalında Azərbaycanı Şuşa şəhərinin “Qarabağ” ansamblı uğurla təmsil edib. Ansamblın festivaldakı çıxışı yaddaqalan olub, tamaşaçıların böyük rəğbətini qazanıb. 25 nəfərlə festivala qatılan nümayəndə heyətinin hazırlığına rəhbərlik edən Şuşa Rayon Mədəniyyət və Turizm Şöbəsinin müdiri Zahid Abbasov səfər təəssüratlarını bizimlə bölüşdü.

- Zahid müəllim, ilk əvvəl festivala dəvətiniz barədə danışaq.

- Bu ilin may ayında Macarıstanın Göngöş şəhəri ilə Şuşa şəhəri arasında qardaşlaşmaya dair saziş imzalanmışdı. Macarıstanda artıq 13 ildir ki, beynəlxalq mahnı və rəqs festivalı keçirilir və builki festivala qardaşlaşmış şəhər kimi Şuşanı da dəvət etdilər. Əslində, dəvət bizim üçün həm gözlənilməz oldu, həm də sevindirici. Şuşa Rayon İcra Hakimiyyəti beynəlxalq festival üçün qısa müddət ərzində Qarabağın musiqi sənətini əks etdirən zəngin proqram hazırlamağa nail oldu. Eyni zamanda kollektivə xüsusi geyim sifariş verdik. Geyimin üzərində ingiliscə “Mən Azərbaycanı sevirəm” və “Şuşa” sözləri həkk edildi.

- Festivalın gündəliyi və çıxışlarınız sizi qane etdimi?

- 12 gün davam edən festivalda Fransa, Kolumbiya, Braziliya, İndoneziya, Gürcüstan, Çin, Serbiya, Portuqaliya, Ukrayna, Yunanıstan və digər dövlətlər iştirak edirdi. Festivalın gündəliyi çox gərgin idi. Gün ərzində müxtəlif məkanlarda üç konsert verirdik. Proqramımıza xalq mahnıları, milli rəqslər və muğamlarımızı daxil etmişdik. Macarıstanın qəsəbələrində, əhalinin sıx toplaşdığı parklarda konsertlər təşkil edilmişdi. Axşam isə xüsusi ayrılmış səhnədə çıxışlarımız olurdu. Ölkələrin demək olar ki, hamısı öz dövlət rəqs ansamblları ilə təmsil olunurdu. Bizim gənc azərbaycanlı musiqiçilər Çin, Fransa, Serbiya, Portuqaliya, Macarıstan, Ukrayna, Yunanıstan və digər ölkələrdən gəlmiş ifaçılarla birlikdə müxtəlif konsert proqramlarında, habelə festivalın bağlanışındakı qala-konsertdə iştirak edərək, qeyri-adi ifaları ilə dinləyicilərin rəğbətini qazandılar. Deyərdim ki, elə ilk gündən tamaşaçıların diqqətini cəlb edə, festival müddətində öz auditoriyamızı yığa bilmişdik. Açılış günü hər kollektivə çıxış üçün qırx dəqiqə vaxt ayrılmışdı. Kollektivimiz Fransa və Çin ilə bir səhnədə çıxış etməli oldu. Düzü, böyük dövlətlərlə eyni səhnəni bölüşməyimizə görə qəlbimdə bir narahatlıq var idi. Nə qədər olmasa, onları dövlət ansamblları təmsil edirdi, biz isə kiçik bir şəhərin kollektivi idik. Amma hər şey gözəl alındı. İnanılmaz uğurla çıxış edən kollektivimiz daha çox alqışa layiq görüldü. Macarıstandakı səfirimiz Vilayət Quliyev də bu çıxışın nəticəsini səbirsizliklə gözləyirdi və kollektivin uğuruna bizim qədər sevinənlərdən biri idi.

- Festivala yollanmağınızda kimlər sizə dəstək oldu?

- Festivala dəvətimiz barədə Mədəniyyət və Turizm Nazirliyinə məlumat verdik və nazirliyin dəstəyi ilə qatıldıq. Dağlıq Qarabağın Azərbaycanlı İcması İctimai Birliyi, Şuşa Rayon İcra Hakimiyyəti bizə yardımçı oldu.

- İştirakçı dövlətlər arasında Qarabağ problemi, ümumiyyətlə, Şuşa haqqında məlumatı olanlar var idimi?

- Bilirsiniz ki, mədəniyyət işçiləri çox zaman siyasətdən uzaq olurlar. Elə bu səbəbdən də bizim problemimiz barədə çox az bilgiləri var idi. Biz özümüzlə Qarabağımızı, Şuşanı tanıtmaq üçün hazırladığımız bukletləri, kitabları aparmışdıq. Festival çərçivəsində həmin bukletləri iştirakçı dövlətlərlə yanaşı, bütün tamaşaçılara paylayırdıq. Çoxları belə bir münaqişənin olmasından xəbərsiz idi. Bağlanış günü festivalın rəhbərliyi böyük səhnədən bütün iştirakçı dövlətlər qarşısında qeyd etdi ki, ən böyük arzumuz Şuşa şəhərinin azad edilməsi və növbəti folklor bayramını məhz həmin şəhərdə keçirməmizdir. Festival rəhbərliyini vaxtilə Şuşada keçirilən “Xarı bülbül” folklor festivalı haqqında da məlumatlandırdıq. Bacardığımız qədər çalışırdıq ki, qədim Azərbaycan şəhəri Şuşa haqqında məlumatlar və Ermənistan silahlı qüvvələri tərəfindən işğal olunmuş Dağlıq Qarabağla bağlı həqiqətləri çatdıra bilək. Mədəniyyətimizi nümayiş etdirməklə yanaşı, qarşımızda duran vacib məsələlərdən biri də bu idi.

- İlk dəfə idi ki, Şuşanı beynəlxalq festivalda təmsil edirdiniz. Nəticələrdən nə dərəcədə razı qaldınız?

- Avqustun 10-u festival çərçivəsində təşkil edilən “Azərbaycan günü” bizim üçün daha da əlamətdar oldu. Həmin gün xüsusi konsert proqramı ilə çıxış edən gənc sənətçilərimiz minlərlə tamaşaçını ehtizaza gətirərək, bitib-tükənməyən alqışlar qazandılar. Ənənəvi üçlüyün - tar, kamança və dəfin müşayiətilə ifa olunan muğamlar, Qafqaz koloritini əks etdirən rəqslər macar tamaşaçıların diqqətini xüsusilə cəlb etmişdi. Həmin proqram Azərbaycanın Macarıstandakı səfirliyinin dəstəyi ilə həyata keçirilirdi. Hətta bizim uşaqların çıxışları və ifa etdikləri musiqi nömrələri Braziliya və Serbiya nümayəndəliyi tərəfindən xüsusi olaraq CD şəklində hazırlandı və həmin ölkələrdə yayımlanmaq üçün bizdən icazə də alındı.

- Göngöşlə Şuşa qardaşlaşmış şəhərlərdir. Bəs Göngöşü Şuşayla muqayisə edə bildinizmi?

- Bəli, gözəl şəhərdir. Bənzərlikləri də çoxdur. Tarixi abidələrlə zəngindir. Onlar da öz abidələri, tarixləri və şəhərləri üçün çox narahatdırlar.

- İkinci dəfə festivala qatılsanız proqrama nələri əlavə edərdiniz və festivalla bağlı yekun fikirləriniz maraqlıdır...

- İkinci dəfə getməli olsaq tamam başqa yeniliklərlə qatılmaq istərdik. Baxmayaraq ki, festival rəhbərliyi çıxışlarımızdan tam razı qaldı, amma təbii olaraq yeni ideya və fikirlər yarandı. Növbəti dəfə özümüzlə sərgi aparmağı da planlaşdırıram. Festivalın son günü kollektivimiz fəxri fərmanla təltif olundu. Bundan böyük sevinc ola bilməzdi. Eyni zamanda, Göngöş şəhərinin meri Laslo Faraqo və Şuşa Rayon İcra Hakimiyyətinin başçısı Bayram Səfərov arasında keçirilən görüşdə gələcək əməkdaşlıq məsələləri müzakirə olundu, merin başçılığıyla Göngöş nümayəndə heyətinin bu ilin payızında Azərbaycana səfəri ilə bağlı razılıq əldə edildi. Səfərimiz zamanı bizə dəstək olan hər kəsə bir daha minnətdarlığımı bildirirəm.

Lalə Azəri

Mədəniyyət.- 2013.- 21 avqust.- S. 5.