“Budağın
xatirələri”
Xalq yazıçısı Əli
Vəliyevin romanı yenidən nəşr olunub
XX əsr Azərbaycan ədəbiyyatının görkəmli nümayəndələrindən biri, Xalq yazıçısı Əli Vəliyevin “Budağın xatirələri” romanı yenidən nəşr olunub. Mədəniyyət və Turizm Nazirliyinin dəstəyi ilə işıq üzü görən iki kitabdan ibarət nəşrin redaktoru yazıçının nəvəsi, tanınmış nasir və dramaturq Afaq Məsuddur. Nəfis tərtibat və yüksək zövqlə hazırlanmış kitab “Elm və Təhsil” nəşriyyat-poliqrafiya müəssisəsində çapdan çıxıb.
Yenidən nəşr olunmuş bu kitabları vərəqlədikcə bir daha əmin olursan ki, XX əsr Azərbaycan ədəbiyyatının görkəmli nümayəndələrindən biri kimi böyük şöhrət qazanmış Əli Vəliyev özünəməxsus ədəbi irsə malik, silsilə romanları ilə nəsrimizi zənginləşdirən unudulmaz yazıçılarımızdan biri kimi tanınaraq sevilir. Qüdrətli qələm sahibi kəşməkəşli XX əsrin ilk ilində dünyaya gəlib, həyatın hər üzünü görə-görə mənsub olduğu xalqın səksən illik bir tarixi mərhələsinin fəal iştirakçısına, bu tarixin bədii salnaməçisinə çevrilib.
Ədibin əsərlərindəki xəlqilik onun təkrarsız şəxsiyyəti ilə bilavasitə bağlıdır. Əli Vəliyevin yaradıcılığı üçün səciyyəvi cəhətlərdən bəlkə də ən birincisi həyatilik, bütün kökləri ilə, bütün varlığı ilə mənsub olduğu Azərbaycan xalqına bağlılıqdır. Uydurma, quraşdırma hadisələr, qeyri-adi əhvalatlar, kitablardan, filmlərdən götürülmüş obrazlar sənətkarın yaradıcılığına yaddır. Görkəmli ədib ancaq gördüklərindən, duyduqlarından, şahidi olduqlarından söhbət açırdı. “Budağın xatirələri”ndə bu söhbətlər o qədər şirin, o qədər inandırıcı, o qədər səmimidir ki, oxucunu qətiyyən yormur, onu real hadisələrin, olmuş əhvalatların coşqun axarına alıb aparır.
Əli Vəliyev nəsrimizə maraqlı mövzular gətirib, ədəbiyyatımızı sanballı əsərlərlə zənginləşdirib. Ədibin yenidən çap olunmuş bu romanı da bir daha sübut edir ki, zaman dəyişsə də onun yaradıcılığına oxucu marağı azalmayıb.
Xalq
yazıçısı bu kitabını ömür-gün yoldaşı Qumru xanıma ithaf edib. Kitabda
yazıçı gördüklərini dörd
hekayətdə ümumiləşdirib. Kitabın redaktoru A.Məsud deyib: “Bu romanı əvvəllər də
oxumuşdum, bu dəfə
redaktor qismində daha
diqqətlə oxumalı oldum və babam olduğuna görə
demirəm, bu qənaətə gəldim ki, Əli Vəliyev biz
düşündüyümüzdən qat-qat
maraqlı və ciddi
yazıçıdır. Əsərin mövzusuna
gəlincə, inqilabdan əvvəlki və
sonrakı dövrlər, sovet
hakimiyyətinin qurulması illəri, qolçomaqlarla
mübarizə, həyata yeni gözlərlə
baxan gənc kommunistlər və s. bu kimi
məqamlar ilk baxışda adama “zamanı ötmüş”
kimi görünsə də, alt qatdan sızan canlı
həyat - az qala salnamə
effekti verən insan
taleləri, yeni quruluşun məhv etdiyi bəy
ailələrinin qısa, təsirli tarixçələri,
yazıçının öz
bioqrafiyası ilə bağlı səmimiliyi, kimsəsizlik və
yazdığı məqamların ağrılarını
özündə saxlaması qüdrəti ilə məni heyran etdi”.
Mədəniyyət.- 2013.- 21
avqust.- S. 13.