Təhsil alan gənc kulinarların respublika çempionatı

Dekabrın 27-də Bakı şəhəri 12 saylı peşə liseyində Dünya Azərbaycanlılarının Həmrəylik Günü və Yeni il bayramı münasibətilə təhsil alan gənc kulinarların I respublika çempionatı keçirildi.

Mədəniyyət və Turizm, Təhsil nazirliklərinin, Milli Kulinariya Mərkəzi və Azərbaycan Milli Kulinariya Assosiasiyasının (AMKA) birgə təşkilatçılığı ilə keçirilən çempionatın məqsədi kulinariya üzrə təhsil alan gənclərin peşə vərdişlərinin inkişafı, gənc kulinarların beynəlxalq müsabiqələrə hazırlanmasıdır.

İştirakçıları salamlayan AMKA-nın prezidenti, UNESCO-nun Ənənəvi Qida Komitəsinin sədri Tahir Əmiraslanov tədbirin əhəmiyyətini diqqətə çatdırdı, belə yarışmaların ölkəmizin mətbəx mədəniyyətinə yeniliklər gətirəcəyini vurğuladı.

Təhsil Nazirliyinin Peşə təhsili şöbəsinin baş mütəxəssisi Zakir Əhmədov yarışmanın təşkilini yüksək qiymətləndirdi, çempionatın ənənəvi olaraq keçirilməsinin vacibliyini qeyd etdi.

Dünya Kulinariya Təşkilatının 100 ballıq qiymətləndirmə sistemi ilə keçirilən çempionatın 12 nəfərdən ibarət münsiflər heyətinə AMKA-nın icraçı direktoru, beynəlxalq çempionatların qalibi, 6-cı dərəcəli aşpaz Ceyran Əsgərova sədrlik edirdi.

Yarışmada paytaxtın universitet, peşə liseyi və kolleclərindən 10 komanda iştirak edirdi. Hər komandada 5 gənc aşpaz yer almışdı. Komanda üzvləri bir nəfər üçün nəzərdə tutulmuş soyuq qəlyanaltı, şorba, əsas yemək, desert və içki hazırlamalı idilər. Kulinarlara öz bacarıqlarını nümayiş etdirmək üçün 1 saat vaxt verildi. Hazırlanmış təamlar qiymətləndirilməsi üçün münsiflər heyətinə təqdim olundu.

Sonra qaliblər elan edildi. 1-ci yerə 12 saylı Bakı peşə liseyi, 2-ci yerə 18 nömrəli Bakı peşə liseyi, 3-cü yerə Bakı turizm peşə məktəbi layiq görüldü. 4-cü yerin sahibi isə Bakı qida sənayesi kolleci oldu.

Bütün iştirakçılara AMKA-nın fəxri diplomları, qaliblərə isə Təhsil Nazirliyinin və sponsorların diplom və hədiyyələri təqdim edildi.

Fariz Hüseynov

Mədəniyyət.- 2013.- 29 dekabr.- S. 13.