Kitabsız kitabxana

Azərbaycanda ilk dəfə “Kitabsız kitabxana” yaradılacaq. Bakı Şəhər Mədəniyyət və Turizm İdarəsinin rəisi Əlikram Əliyevin verdiyi məlumata görə, layihə “İnformasiya-kommunikasiya texnologiyaları ili” çərçivəsində həyata keçirilir: “Bu, innovativ layihədir. Yeni kitabxanada kitab olmayacaq. Oxucular kompyuter, planşet, monitor və sairədən istifadə edərək elektron kitabları rahat şəkildə oxuyacaqlar. Beləliklə, İKT-nin son yeniliklərindən istifadə etməklə çağdaş və komfortlu bir kitabxana yaradacağıq”.

İdarə rəisinin sözlərinə görə, oxucular burada bütün kataloqlardan təmənnasız istifadə edə biləcəklər. Kitabxanada məktəb yaşlı və bağça uşaqları üçün də tələblər nəzərə alınacaq: “Uşaqlar üçün “Canlı kitab” guşəsi yaradılacaq. Bu, monitordan canlı şəkildə oxumaq üçün nəzərdə tutulub. Azyaşlılara müxtəlif nağıllara vizual, izahlı şəkildə baxmaq üçün hər cür şərait yaradılacaq”.

Qeyd edək ki, “Kitabsız kitabxana”nın Nizami rayonunda açılması nəzərdə tutulur. Bunun üçün artıq müvafiq yer ayrılıb. Kitabxananın pulsuz xidmətlərindən eyni vaxtda 50 oxucu istifadə edə biləcək.

Ceyhun

Mədəniyyət.- 2013.- 13 fevral.- S. 12.