Dünya Turizm Təşkilatının İcraiyyə Şurasının iclası

Nümayəndə heyətimiz Belqradda bir sıra görüşlər keçirib

Mayın 26-dan 29-dək Serbiyanın paytaxtı Belqradda Dünya Turizm Təşkilatı (DTT) İcraiyyə Şurasının 95-ci iclası keçirilib. Tədbirdə Azərbaycanı mədəniyyət və turizm nazirinin müavini Nazim Səmədovun başçılıq etdiyi nümayəndə heyəti təmsil edib.

İclasda Dünya Turizm Təşkilatının baş katibi Taleb Rifainin ötən müddət ərzində beynəlxalq turizm sahəsindəki vəziyyət barədə hesabatı dinlənilib, gələn il üçün proqnozlar, DTT tərəfindən keçirilən tədbirlər haqqında məlumat verilib. Bununla yanaşı, iclas zamanı təşkilatın maliyyə vəziyyəti, gələcək illər üçün fəaliyyət proqramları, DTT-nin baş katibi vəzifəsinə seçkilər, Dünya Turizm Günü və digər məsələlər müzakirə edilib.

Qeyd edək ki, iclasda Azərbaycan nümayəndə heyəti müşahidəçi qismində iştirak edib. Səfər eyni zamanda bu ilin avqustunda Zambiya və Zimbabvedə DTT Baş Assambleyasının 20-ci sessiyasında İcraiyyə Şurasına keçiriləcək seçkilərə hazırlıq məqsədi daşıyırdı. Ölkəmiz qurumun İcraiyyə Şurası üzvlüyünə namizədliyini irəli sürüb.

İclas müddətində tədbir iştirakçılarına Azərbaycanla Dünya Turizm Təşkilatı arasında əməkdaşlıq haqqında təbliğat materialları paylanıb.

Səfər zamanı nümayəndə heyətimiz ikitərəfli görüşlər də keçirib. «Özbəkturizm» milli turizm şirkətinin sədri Farrux Rizayev, Serbiyanın İqtisadiyyat və Regional İnkişaf Nazirliyinin dövlət katibi Goran Petkoviç, həmin ölkənin maliyyə və iqtisadiyyat nazirinin müavini Renata Pinzo və Xorvatiyanın turizm naziri Darko Lorençinlə görüşlər baş tutub. Biznes turizminin inkişaf etdirilməsi üçün konqres büronun yaradılması və bununla bağlı təşkilati fəaliyyətin həyata keçirilməsi sahəsində təcrübə mübadiləsi məqsədilə Serbiyanın Konqres Bürosunun direktoru Miloş Milazanoviçlə də görüş keçirilib.

Azərbaycan nümayəndə heyəti ölkəmizin Serbiyadakı səfirliyinin 28 May - Respublika Günü münasibətilə təşkil etdiyi tədbirdə də iştirak edib.

Fəxriyyə Abdullayeva

Mədəniyyət.- 2013.- 7 iyun.- S. 6.