“Dünyanın musiqi filmləri turu”

II Dünya Mədəniyyətlərarası Dialoq Forumu çərçivəsində keçirilən mədəni tədbirlər sırasında “Dünyanın musiqi filmləri turu” proqramı da yer alıb.

Mayın 28-də Dənizkənarı Milli Parkda açıq səma altında qurulmuş böyük ekranda filmlərin nümayişi başlanıb. İlk günün proqramına “Bu kimin mahnısıdır?” (Bolqarıstan), “Musiqini susdurmaq” (Böyük Britaniya, Əfqanıstan) və “Kolombiana” (ABŞ) filmləri daxil edilib.

“Dünyanın musiqi filmləri turu” iyunun 1-dək davam edəcək. Şəhər sakinləri proqrama daxil edilmiş digər ölkələrin film nümunələrinə tamaşa edərək Argentina tanqosu, Balkan yarımadasındakı dövlətlərdə yayılmış türk musiqisi, ənənəvi ərəb musiqisi, Alim Qasımovun ifasında Azərbaycan muğamı və bir çox başqa xalqların folklor musiqisi nümunələri ilə tanış olmaq imkanı qazanacaqlar.

Proqrama daxil olan dünya xalqlarının etnik və ənənəvi musiqisinə həsr olunan filmlər Azərbaycan, Almaniya, İspaniya, Fransa, Hindistan, Bolqarıstan, Əfqanıstan, Böyük Britaniya, ABŞ, Mərakeş, Meksika və başqa ölkələrdə çəkilib. Film nümayişlərinə bu ölkələrin kino və musiqi ustalarının birgə məhsulu olan audiovizual əsərlər daxil edilib.

Nigar

Mədəniyyət.- 2013.- 31 may.- S. 12.