Şuşa - əsirlikdə olan mədəniyyət şəhərimiz

Mayın 3-də Bakıdakı İlyas Əfəndiyev adına Elitar Gimnaziyada Təhsil Nazirliyi, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi və Şuşa Rayon İcra Hakimiyyətinin birgə təşkilatçılığı ilə “Şuşa - əsirlikdə olan mədəniyyət şəhərimiz” mövzusunda tədbir keçirilib.

İştirakçılar əvvəlcə məktəbin həyətində və foyesində Azərbaycanın dilbər guşəsi Şuşaya həsr edilmiş sərgi ilə tanış olublar.

Tədbirdə “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin sədri, Şuşa Rayon İcra Hakimiyyətinin başçısı Bayram Səfərov, Milli Məclisin deputatı Elman Məmmədov, Qaçqınların və Məcburi Köçkünlərin İşləri üzrə Dövlət Komitəsi Aparatının rəhbəri Məhəmməd Məhərrəmov çıxış edərək Şuşanın tarixi irsi barədə danışıblar.

Bildirilib ki, 1992-ci il mayın 8-də Şuşanın Ermənistan silahlı qüvvələri tərəfindən zəbt olunması nəticəsində Şuşanın tarixi abidələri, mədəniyyət ocaqları, kitabxanalar, kinoteatr, sanatoriya turist bazaları, Şərq musiqi alətləri fabriki, dövlət rəsm qalereyası, uşaq sağlamlıq məktəbi talan edilib və dağıdılıb.

Tədbirdə “Şuşanın tarixi abidələri və görkəmli şəxsiyyətləri” adlı sənədli film nümayiş olunub.

Mədəniyyət.- 2013.- 8 may.- S. 10.