Tanınmış qarmon ifaçısı Zakir Mirzəyevin yubileyi

Oktyabrın 30-da Dövlət Mahnı Teatrında tanınmış qarmon ustası, Əməkdar artist, sənətşünaslıq üzrə fəlsəfə doktoru Zakir Mirzəyevin anadan olmasının 70 illiyinə həsr edilmiş gecə keçirilib.

Tədbirdə çıxış edən Azərbaycan Milli Konservatoriyasının rektoru, Xalq artisti Siyavuş Kərimi yubilyarı Azərbaycan muğamlarının bilicisi, öz sənətini yeni nəslə yorulmadan təbliğ edən fədakar pedaqoq və cəfakeş alim kimi səciyyələndirib, ona rəhbərlik etdiyi təhsil ocağının fəxri fərmanını təqdim edib.

Bakı Dövlət Universitetinin ilahiyyat fakültəsinin dekanı, akademik Vasim Məmmədəliyev qeyd edib ki, Zakir Mirzəyev qarmon ifaçılığında Kəlbəlayi Lətif, Əhəd, Abutalıb, Teyyub Dəmirov kimi azman sənətkarlardan sonra bu sənətdə öz dəst-xəttini yaradıb. Xalq artistləri Əlibaba Məmmədov, Arif Babayev və başqaları Zakir Mirzəyevin xalq arasında hörmət qazanmış musiqiçi və insan kimi yüksək keyfiyyətlərindən danışıblar.

Gecədə incəsənət ustalarının ifasında xalq mahnıları, muğam və təsniflər ifa olunub. Sonda çıxış edən Z.Mirzəyev tədbirin təşkilatçılarına və iştirakçılarına minnətdarlığını bildirib.

Mədəniyyət.- 2013.- 1 noyabr.- S. 4.