Moskvada Tamara Sinyavskayanın yubileyi qeyd edilib

Oktyabrın 1-də Rusiya Dövlət Akademik Böyük Teatrında məşhur opera müğənnisi, SSRİ-nin və Azərbaycanın Xalq artisti, dünya şöhrətli musiqiçi Müslüm Maqomayevin ömür-gün yoldaşı Tamara Sinyavskayanın 70 illik yubileyi münasibətilə tədbir keçirilib. Tamara Sinyavskaya Rusiyanın bu ən məşhur səhnəsində 40 ilə yaxın çıxış edib.

Yubiley gecəsində Böyük Teatrın kollektivi müğənninin şərəfinə “Boris Qodunov” tamaşasını göstərib. Vaxtilə Tamara Sinyavskaya bu operada Marina Mnişek partiyasını çox parlaq ifa edib.

Tamaşa başlanmazdan əvvəl Tamara Sinyavskayanın yaradıcılığından ayrı-ayrı epizodların toplandığı videoçarx nümayiş etdirilib. Sonra Rusiya Dövlət Duması sədrinin müavini Lyudmila Şvetsova və teatrın baş direktoru Vladimir Urin aktrisanı təbrik ediblər.

V.Urin deyib: “Bu videoçarxda Tamara Sinyavskayanın son dərəcə maraqlı yaradıcılıq taleyinin, görkəmli müğənninin Böyük Teatr səhnəsində gördüyü işlərin yalnız az bir qismi toplanıb. Mən fəxr edirəm ki, bu gün burada onun kimi məlahətli və gözəl qadının yanında dayanmışam”.

Lyudmila Şvetsova qeyd edib ki, Tamara Sinyavskayanın bütün dünyada məşhurlaşmasına, milyonlarla tamaşaçının sevgisini qazanmasına səbəb onun bir insan kimi cəlbedici olmasıdır: “Bu gün biz böyük müğənninin, öz yaradıcılığı ilə bütün dünyada hörmət və məhəbbət qazanmış gözəl qadının yubileyini qeyd edirik. O, səhnədə çoxlu müxtəlif obrazlar yaratmışdır. Lakin bütün bu obrazlara xas olan bir ümumi cəhət var - aktrisanın böyük məlahəti. O, məhz bu məlahəti yaratdığı hər bir obraza bəxş edib. Biz sizin istedadınıza heyranıq”.

Tamara Sinyavskaya tamaşaçıların gurultulu alqış sədaları altında mikrofona yaxınlaşaraq, tədbirə toplaşanların hamısına təşəkkürünü bildirib: “Sağ olsun Böyük Teatr. Bura mənim doğma evimdir, mən onu heç vaxt dəyişməmişəm və dəyişmərəm. Bu teatrı ona görə sevirəm ki, bu məşhur səhnədə çıxış etmiş bütün böyük müğənnilərin səsləri burada indiyə qədər eşidilir. İstərdim ki, mənim də səsim onun divarlarında qalsın və uzun müddət burada yaşasın”.

Xatırladaq ki, Prezident İlham Əliyevin sərəncamı ilə SSRİ-nin və Azərbaycanın Xalq artisti Tamara Sinyavskaya “Dostluq” ordeni ilə təltif edilib. Müğənni bu yüksək təltifə Azərbaycan mədəniyyətinin populyarlaşdırılması sahəsində xidmətlərinə görə layiq görülüb.

Mədəniyyət.- 2013.- 4 oktyabr.- S. 7.