Mədəniyyət və Turizm Nazirliyində kollegiya iclası keçirilib

 

Oktyabrın 11-də Mədəniyyət və Turizm Nazirliyində kollegiya iclası keçirilib.

İclasın gündəliyinə uyğun olaraq bir sıra məsələlər, o cümlədən 29 may-1 iyun 2013-cü il tarixində Bakıda keçirilən II Dünya Mədəniyyətlərarası Dialoq Forumunun nəticələri, 2012-2013-cü tədris ilinin yekunları və respublika uşaq musiqi, incəsənət və rəssamlıq məktəblərinin fəaliyyətinin yaxşılaşdırılması sahəsində qarşıda duran vəzifələr, bu ilin may-iyun aylarında bir sıra şəhər və rayonlardakı mehmanxanamehmanxana tipli obyektlərdə keçirilmiş monitorinqin nəticələri, Lənkəran Şəhər Mədəniyyət və Turizm Şöbəsi və tabeliyində olan müəssisələrin fəaliyyəti müzakirə olunub.

Kollegiyada çıxış edən mədəniyyət və turizm naziri Əbülfəs Qarayev II Dünya Mədəniyyətlərarası Dialoq Forumunun nəticələrini yüksək dəyərləndirib. Qeyd olunub ki, Azərbaycan Respublikasının Prezidenti İlham Əliyevin təşəbbüsü və himayəsi ilə gerçəkləşən Forum ölkəmizin mədəniyyətlər və sivilizasiyalararası dialoq məkanında multikulturalizmin əsas mərkəzlərindən birinə çevrildiyini göstərir.

İclasda Forumun Bakıda beynəlxalq mərkəzinin yaradılması ilə bağlı lazımi tədbirlərin görülməsi, 2015-ci ilin payızına nəzərdə tutulan III Dünya Mədəniyyətlərarası Dialoq Forumu ilə bağlı tədbirlər planının hazırlanması, tədbir çərçivəsində dünya ölkələrinin mədəniyyət və turizm nazirlərinin ikinci görüşünün təşkili, Foruma dair kitab-kataloqun nəşr edilməsi və digər məsələlər müzakirə olunub, müvafiq qərar qəbul edilib. Nazirliyin Beynəlxalq əlaqələr və mədəniyyət proqramları şöbəsinə tapşırıqlar verilib.

2013-cü ilin may-iyun aylarında respublikanın bir sıra şəhər və rayonlarında mehmanxanamehmanxana tipli obyektlərdə keçirilmiş monitorinqlərin nəticələrindən danışan nazir Əbülfəs Qarayev bununla bağlı Azərbaycan Turizm Assosiasiyasında geniş müzakirələr aparılacağını deyib. İqtisadi İnkişaf, Səhiyyə nazirlikləri və digər dövlət qurumları nümayəndələrinin də iştirak etdikləri monitorinqlər zamanı ciddi problemlərin ortaya çıxdığını deyən nazir, turizm müəssisələrinin öz işlərinə daha məsuliyyətli yanaşması üçün bu sahəyə nəzarəti gücləndirməyin vacibliyini vurğulayıb. İclasda nazirliyin Turizm şöbəsi tərəfindən bölgələrdə fəaliyyət göstərən mehmanxanaların rəhbərləri üçün idarəetmə ilə bağlı seminarların təşkili, şöbənin Bakı Şəhər Mədəniyyət və Turizm İdarəsi ilə birlikdə paytaxtdakı mehmanxanalarda monitorinqlər keçirməsi məsələsi də müzakirə olunub.

2012-2013-cü tədris ilinin yekunları barədə danışan nazir uşaq musiqi, incəsənət və rəssamlıq məktəblərinin fəaliyyətinin yaxşılaşdırılması sahəsində qarşıda duran vəzifələrdən danışıb. Vurğulanıb ki, məktəblərin maddi-texniki bazasının yaxşılaşdırılması, təmir və yenidənqurma işləri ilə yanaşı, ümumilikdə tədris müəssisələrinin fəaliyyəti, üslubu da yenilənməli, günün tələblərinə cavab verməlidir.

 

Ceyhun Zərbəliyev

 

Mədəniyyət.- 2013.- 18 oktyabr.- S. 4.