Bəstəkarlarımızın
əsərləri Finlandiya
ansamblının ifasında
Diskdə Qara Qarayev, Tofiq Quliyev, Cahangir Cahangirov və Rauf Hacıyevin musiqiləri yer alıb
Finlandiyada yaşayan həmvətənimiz,
Kokkola şəhər
konservatoriyasının skripka sinfi üzrə professoru Cahangir Ələkbərov 20 ilə yaxın
buradakı skripkaçılar ansamblına rəhbərlik edib. Bu, şəhər
konservatoriyasının nəzdində yaradılmış ilk ansambllardan biridir.
Ansamblın fəaliyyətinin başa çatması ilə əlaqədar “Skripkaçılar ansamblının konserti” adlı disk buraxılıb. Diskdə kollektivin ifasında dünya klassik musiqisi, habelə Azərbaycan bəstəkarlarının əsərləri yer alıb. Konsert tanınmış Azərbaycan bəstəkarı Rauf Hacıyevin musiqisi ilə başlanır. Diskə Qara Qarayevin “İldırımlı yollarla” baletindən parçalar, “Yeddi gözəl” baletindən vals, habelə Tofiq Quliyevin, Cahangir Cahangirovun əsərləri, fin bəstəkarlarının Rauf Hacıyev tərəfindən aranjiman edilmiş əsərləri daxildir. Diskin üz qabığında musiqi mədəniyyətinin inkişafına və pedaqoji fəaliyyətə köməyinə görə Cahangir Ələkbərova minnətdarlıq sözləri yazılıb.
Cahangir Ələkbərov deyib ki, Finlandiyada
onun apardığı işin
məqsədlərindən biri Azərbaycanın
zəngin mədəniyyətini təbliğ etməkdir.
Hazırda azərbaycanlı professor yeni skripkaçılar ansamblı yaradır. Bu ansamblın tərkibinə Kokkola
şəhər konservatoriyasının istedadlı tələbələri
daxil olacaq. O deyib: “Yeni ansambl
yaratmaqla mən Azərbaycan musiqisinin ecazkar koloritini, melodikliyini, rəngarəng
səs çalarlarını Finlandiyanın yeni
nəslinə çatdırmaq imkanı əldə edirəm.
Şən, temperamentli, dərin mənalı
lirik Azərbaycan ritmləri fin dinləyicisinə xoş
gəlir”.
Mədəniyyət.- 2014.- 29
avqust.- S. 5.