"Mədəniyyətlərarası körpülərin qurulması"

Varşavada Azərbaycanla bağlı fotosərgi və konfrans təşkil edilib

Polşanın "Təhsil və İnkişaf üzrə Avropa Fondu" Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə "Mədəniyyətlərarası körpülərin qurulması" adlı layihə həyata keçirir. Layihə çərçivəsində iyulun 13-də Varşavanın Mito qalereyasında Azərbaycanla bağlı fotosərgi və konfrans təşkil edilib. Sərgidə yer alan fotolar Azərbaycanın bugünkü inkişafı, mədəniyyəti əksini tapıb. Tədbirlərdə QHT-lərə Dövlət Dəstəyi Şurasının sədri, Milli Məclisin deputatı Azay Quliyevin rəhbərliyi ilə nümayəndə heyəti iştirak edib.

Layihənin məqsədi Azərbaycan və Polşa mədəniyyətlərinin qarşılıqlı əlaqələrini təbliğ etmək, xalqımızın qədim tarixi, zəngin mədəniyyəti, müasir inkişafı və Ermənistan-Azərbaycan, Dağlıq Qarabağ münaqişəsi haqqında Polşa ictimaiyyətinə obyektiv və dolğun informasiya çatdırmaqdır. Layihəyə uyğun olaraq "Təhsil və İnkişaf üzrə Avropa Fondu"nun jurnalistlərdən və fotoqraflardan ibarət heyəti bu ilin aprelində ölkəmizə səfər edərək müxtəlif bölgələrdə yerləşən muzeylərdə, mədəniyyət mərkəzlərində, tarixi-mədəni abidələrdə, qaçqın və məcburi köçkün qəsəbələrində və turizm ərazilərində çəkilişlər aparıblar.

Mədəniyyət. - 2014.- 18 iyul.- S. 3.