Həmkarımız faciəli şəkildə həlak olub

“Qarabağ” qəzetinin baş redaktorunun müavini Sarvan Ağayev iyulun 17-də faciəli şəkildə həlak olub. Paytaxtın Nobel prospektində yolu keçərkən onu maşın vurub. Azərbaycan Mətbuat Şurası jurnalistin ölümü ilə bağlı nekroloq yayıb.

Nekroloqda qeyd olunur ki, 1955-ci il sentyabrın 18-də Ağdamda dünyaya gələn Sarvan Şamil oğlu Ağayevi həmkarları işgüzar, səmimi insan, istedadlı qələm sahibi kimi tanıyırdı. Qarabağı demək olar qarış-qarış gəzmişdi. Şair təbi, incə duyğuları yaradıcılıq nümunələrində də özünü büruzə verirdi.

24 il “Qarabağ” qəzetində çalışan Sarvan Ağayev bir neçə kitabın müəllifidir. 2005-ci ildə milli mətbuatımızın 130 illik yubileyi münasibətilə Azərbaycan Respublikasının Prezidenti İlham Əliyevin sərəncamına əsasən “Tərəqqi” medalına layiq görülmüşdü: “Hələ neçə-neçə məzmunlu, dolğun nümunələri ilə müasir mediamıza töhfələrini verəcəkdi. Lakin müdhiş qəza daha bir həmkarımızın ömrünə erkən son qoydu. Allah rəhmət eləsin, ruhu şad olsun”.

Mədəniyyət. - 2014.- 23 iyul.- S. 14.