Bülbülün memorial muzeyinin saytı istifadəyə verilib

Mayın 21-də Bülbülün memorial muzeyinin internet saytının təqdimat mərasimi keçirildi. Mərasimdə tanınmış elm və incəsənət xadimləri, muzey direktorları iştirak edirdilər.

İştirakçıları salamlayan muzeyin direktoru Lalə Həsənova Azərbaycan professional vokal sənətinin banisi, SSRİ Xalq artisti, professor, ictimai xadim Bülbülün həyat və yaradıcılığı haqqında məlumat verdi. İnformasiya texnologiyalarının həyatımızda önəmli rolundan söz açan L.Həsənova ötən ilin Azərbaycanda “İnformasiya texnologiyaları ili” olduğunu xatırlatdı. Qeyd olundu ki, mədəniyyət və turizm naziri Əbülfəs Qarayevin muzeylərin rəsmi saytının yaradılması ilə bağlı göstərişindən sonra Bülbülün memorial muzeyinin də saytı hazırlanmışdır.

Bulbulmuseum.az saytı “Muzey”, “Bülbül haqqında”, “Ekspozisiya”, “Bülbülün arxivi”, “Foto”, “Vokal sənəti haqqında” və “Video qalereya” bölmələrdən ibarətdir. Saytda Bülbülün həyat və yaradıcılığı haqqında geniş məlumat yerləşdirlmiş, muzeyin ekspozisiyasında nümayiş etdirilən və fondda saxlanan muzey əşyalarının, o cümlədən Bülbülün arxivinin elektron forması hazırlanmışdır. Musiqisevərlər Bülbülün ifasında ariyaları, təsnifləri, xalq mahnı və romanslarını dinləyə bilərlər.

Saytla tanışlıqdan sonra Mədəniyyət və Turizm Nazirliyinin Muzey işi sektorunun müdiri Azadə Hüseynova fikirlərini bölüşdü, nazir Əbülfəs Qarayevin muzeylərin rəsmi saytlarının yaradılması haqqında göstərişinin ilk olaraq Bülbülün memorial muzeyi tərəfindən yerinə yetirildiyini, saytın maraqlı hazırlandığını qeyd etdi.

Tədbirdə Azərbaycan Musiqi Mədəniyyəti Dövlət Muzeyinin direktoru, Əməkdar mədəniyyət işçisi Alla Bayramova, Əməkdar incəsənət xadimi Aydın Kazımzadə, ADMİU-nun dosenti, pedaqogika üzrə fəlsəfə doktoru Yeganə Eyvazova çıxış etdilər. Bülbül məktəbinin davamçısı, AzTV musiqi kollektivlərinin bədii rəhbəri, vokalçı Ramil Qasımov bu günün onun üçün çox dəyərli olduğunu vurğuladı. Bülbül məktəbinin sönməz, əbədi olduğunu və bu məktəbin davamçısı olması ilə fəxr etdiyini deyən vokalçı Bülbülün repertuarından nümunələr ifa etdi.

Fərqanə Cabbarova,

Bülbülün memorial muzeyinin fond müdiri

Mədəniyyət.- 2014.- 23 may.- S. 4.