Nəsrin Cavadzadə
Türkiyənin “Ən yaxşı aktrisa”sı oldu
Antalya şəhərində 10-18 oktyabr tarixində keçirilən 51-ci beynəlxalq “Altın portağal” film festivalı müxtəlif nominasiyalarda qaliblərin mükafatlandırılması ilə başa çatıb. Mərasimdə əslən Azərbaycandan olan Nəsrin Cavadzadə “Ən yaxşı qadın oyunçu” nominasiyasında “Altın portağal”a layiq görülüb. Aktrisa rejissor Kutluğ Atamanın “Quzu” filmindəki roluna görə mükafatlandırılıb. Ekran əsəri 5 nominasiya üzrə festivalın ən yaxşı filmi seçilib.
Qeyd edək ki, “Altın portağal” Türkiyə kino sənayesinin ən nüfuzlu mükafatı sayılır. Bu, azərbaycanlı aktrisanın ikinci “Altın portağal”ıdır.
Nəsrin Cavadzadə 1982-ci ildə Bakıda doğulub. Məşhur uroloq, akademik Mirməmməd Cavadzadənin nəvəsidir. Nəsrin 11 yaşında ikən ixtisasca həkim olan anası Fəridə xanımla İstanbula köçüb. Mərmərə Universitetinin kino və televiziya fakültəsini bitirib.
2004-cü ildə Eyton Foksun “Suda gəzinti” filmində epizodik rolu ilə kinoya gəlib. Cemal Şanın “Dilbərin səkkiz günü” filmindən sonra kino tənqidçilərinin rəğbətini qazanıb. 2014-cü ildə aktrisa üç filmdə yaratdığı bir-birindən fərqli obrazlarla gündəmə gəlib. Antalya festivalında uğur qazanan “Quzu” filmində aktrisa kənddə yaşayan gənc ananı canlandırır.
Erol Mintaşın
“Anamın mahnısı” filmində isə Nəsrin Cavadzadə
şəhərli gənc qadın rolunu
oynayır. Hadisələr bir
mahnının arxasınca şəhərə gələn ana və oğulun kövrək
hekayəsi ətrafında cərəyan edir.
Aktrisa Çanaqqala
hadisələrindən bəhs edən və xüsusi
effektlərlə zəngin “Son məktub”
filmində (rejissor Özhan
Eren) 22 yaşlı tibb
bacısını canlandırıb. Film
2015-ci ilin fevralında ekranlara
çıxacaq.
Mədəniyyət.- 2014.- 22
oktyabr.- S. 16.