“Çağlar zaman-zaman Hüseyn Arif...”

Ağstafada yubiley tədbiri

Bu gün respublikamızda həyatın bütün sahələrində olduğu kimi, mədəniyyət, incəsənət və ədəbiyyata da dövlət qayğısı göstərilir. Bu diqqət-qayğı Ağstafa rayonunda da özünü göstərir.

Rayonda Gənclər Mərkəzi, “Kitab” abidə kompleksi, “Yazıçılar evi” inşa edilmiş, Səməd Vurğun, tarixi və müasir abidələr parkları salınmışdır. Prezident İlham Əliyevin 2014-cü il 30 iyun tarixində Xalq şairi Hüseyn Arifin adını daşıyan Ağstafa şəhər 7 illik uşaq musiqi məktəbinin yeni binasının tikintisi və rayon Mədəniyyət evinin əsaslı təmiri məqsədilə imzaladığı sərəncam da bu qayğı və diqqətin əyani təzahürüdür.

Rayonda mütəmadi olaraq görkəmli mədəniyyət xadimlərinin yubileyləri, xatirə gecələri, şair və yazıçıların əsərlərinin təqdimat mərasimləri keçirilir. Ağstafanın görkəmli simalarından biri də Xalq şairi Hüseyn Arif (1924-1992) olmuşdur. Bu günlərdə Ağstafa şəhər Səməd Vurğun adına mədəniyyət və istirahət parkında yerləşən “Yazıçılar evi”ndə şairin 90 illiyi münasibətilə yubiley tədbiri keçirilmişdir.

Tədbiri rayon İcra Hakimiyyətinin başçısı Məhərrəm Quliyev açaraq bildirdi ki, ölkə Prezidenti İlham Əliyevin 2 may 2014-cü il tarixli “Hüseyn Arifin 90 illik yubileyinin keçirilməsi haqqında” sərəncamı şairin xatirəsinə böyük ehtiramın bariz nümunəsidir. Qeyd etdi ki, Hüseyn Arif xalqımızın zəngin bədii-poetik irsi zəminində dəyərli əsərlər meydana gətirmiş və milli ədəbiyyata töhfələr vermişdir.

Tədbirin aparıcısı - Heydər Əliyev Muzey-Mərkəzinin direktor əvəzi Layiq Qələndərov şairin həyat və yaradıcılıq yolu haqqında ətraflı məlumat verdi.

Azərbaycan Yazıçılar Birliyi Qazax filialının sədri Barat Vüsal qeyd etdi ki, Hüseyn Arif təbiəti bu qədər sevdiyi üçün onu çox qayğıkeşliklə qorumağa çağırırdı. Şairin fikrincə, təbiət ona zülm edənlərdən öc alır, bunun aqibəti acı olur. Şairin bu ruhda düşüncələri bu gün ekoloji tərbiyə üçün nə qədər ibrətamizdir.

Xalq artisti Tariyel Qasımovun sözlərinə görə, Hüseyn Arifin yaradıcılığının əzəli qaynaqlarından biri təbiət idi. Doğma Azərbaycan təbiətinin möhtəşəm gözəlliyinə vurğunluq onun poeziyasında çeşidli bədii təcəssümünü tapmışdır.

Ədibin yaradıcılığını ətraflı təhlil edən şair Ağacəfər Həsənli qeyd etdi ki, ana torpağın şeriyyət dolu aləmini şair öz poetik taleyi kimi anladır:

Deyirlər: arabir şeirimin səsi

Çəməni, çiçəyi gətirir yada.

Deyirlər: vaxt olur könül nəğməsi

Tufanı, şimşəyi gətirir yada.

Şair Cığatel İsaqızı şairin təbiət lövhələrinə həsr etdiyi şeirləri barədə danışdı.

Mədəniyyət evinin əməkdaşı Vaqif Mehdiyev şairin “Yaş altmışdır” adlı lirik şeirini xüsusi şövqlə söylədi.

Hüseyn Arif şairliklə yanaşı, Azərbaycan Aşıqlar Birliyinin rəhbəri kimi də səmərəli fəaliyyət göstərmişdir. Dədə Qorqud yadigarı ulu sənətin oyanışı həm də onun adı ilə bağlıdır:

Çox verib imtahan Hüseyn Arif,

Çağlar zaman-zaman Hüseyn Arif,

Getməz qulaqlardan Hüseyn Arif,

Son aşıq sazını çalana qədər...

Ədəbi-bədii gecədə Ağstafa şəhər Hüseyn Arif adına 7 illik musiqi məktəbin ansamblının müşayiəti ilə xanəndələr şairin sözlərinə bəstələnmiş şux mahnılar ifa etdilər.

Əli Cəfəroğlu,

Prezident təqaüdçüsü, yazıçı, Azərbaycan Yazıçılar Birliyinin üzvü

Mədəniyyət.- 2014.- 24 oktyabr.- S. 6.