Kurortlar və abidələr ölkəsi
İl ərzində
Çexiyaya 7 milyon turist səfər edir
“Ah...
Avropa, Avropa...”
Görkəmli yazıçımız Əbdürrəhim bəy
Haqverdiyevin əsərləri əsasında
çəkilmiş «Papaq» filmində azərbaycanlı
bəyzadələrin nostalji hisslərlə
dediyi bu sözlər
hər birimizə tanışdır. Avropa
təhsili alan bu gənclər
köhnə qitənin gözəlliyinin təsirindən uzun müddət çıxa bilmirlər...
Azərbaycanın bir qrup media nümayəndəsinin oktyabrın 20-dən 25-dək Çexiyaya səfəri zamanı yaranan təəssüratlar da məhz bu baxımdan fərqlənmədi desək, yanılmarıq. «SİS Tour» və «Chex Tour» şirkətlərinin təşkilatçılığı, Çexiyanın Azərbaycandakı səfirliyinin və Mədəniyyət və Turizm Nazirliyinin dəstəyi ilə gerçəkləşən səfərin proqramı da maraqlı və zəngin idi...
Dünya turistlərinin sevdiyi məkan
Şərqi Avropanın səfalı və füsunkar təbiəti, tarixi tikililəri və abidələri ilə məşhur olan bu ölkəsi dünya turistləri arasında ən populyar məkanlardan biridir. Ərazisi cəmi 78,8 min kvadrat kilometr, əhalisi 10,5 milyon nəfər olan Çexiyaya ildə 7 milyona yaxın turist gəlir. Ölkənin ümumi daxili məhsulunun təxminən 6 faizini turizm sektoru təşkil edir.
Çexiya kurortları artıq bütün dünyada populyarlıq qazanıb. Səfərimizin proqramına uyğun olaraq ilk baş çəkdiyimiz məkan da bu ölkənin məşhur kurort mərkəzi - Karlovı Varı oldu.
Bizi müşayiət edən bələdçimiz Olqa Çernyuk məlumat verir ki, 55 minə yaxın əhalisi olan Karlovı Varının əsası 1350-ci ildə Çexiya şahzadəsi IV Karl tərəfindən qoyulub. Hər il buraya dünyanın 70 ölkəsindən 3 milyona yaxın turist gəlir. Karlovı Varıda çoxlu sayda qeyri-adi mineral su mənbələri mövcuddur. Şəhərin ən böyük və ən məşhur tikilisi «Mill Kolonada»dır. Bulaqların əksəriyyəti məhz burada yerləşir.
Ümumilikdə Karlovı Varıda 80 mineral su mənbəyi var ki, onların 12-dən geniş istifadə olunur. Bu mənbələr bir-birindən temperaturu (30°-dən 72°-dək), karbon qazının tərkibi və təsiri ilə seçilir. Sular təbii ion qatışığı olmaqla orqanizmi cavanlaşdırır və ona yeni qüvvə verir. Bir dəqiqədə yer səthinə 70 dərəcəyə yaxın temperaturu olan 2000 litr su çıxır. Ən çox tanınan mənbə 2000 metrə yaxın dərinlikdən çıxan və dəqiqədə 1500 litrə yaxın həcmdə suyu olan “Geyzer”dir.
Yerdən çıxdıqdan cəmi 3 saat sonra sular öz müalicəvi xüsusiyyətini itirir. Bu səbəbdən də Karlovı Varının əsas küçəsində hər kəsin əlində xüsusi formada fincan görmək mümkündür. Suyu elə içmək lazımdır ki, dişlərə dəyməsin, çünki mədə-bağırsaq sistemi xəstəliklərinin təbii müalicəsi funksiyasını daşıyan bu mineral sular insanın dişləri üçün inanılmaz dərəcədə ziyanlıdır.
Karlovı Varı sakitliyi və rahatlığı dəyərləndirməyi bacaran insanların yeridir. Burada turistlərin baş çəkə biləcəyi məkanlar tarixi «Diana» qülləsi, «IV Karl qalası», «Müqəddəs Mariya Maqdalena» məbədi və «Yapon bağı»dır.
600 illik tarixə malik Karlovı Varı həm də kinofestivalı ilə məşhurdur. Hər il reallaşan festival əsasən iyulun əvvəlində keçirilir. Builki festivalda məşhur Hollivud ulduzu Mel Gibson da iştirak edib.
Bundan başqa,
turistlərin burada
tennis, boulinq, bilyard, qolf oynamaq, at minmək imkanları da var. Hər axşam şəhər filarmoniyasında təşkil
edilən canlı konsertlər isə musiqi həvəskarları
üçün əsl
sürprizdir.
Hazırda Karlovı Varıda binaların geniş miqyasda təmiri və restavrasiyası prosesi gedir. Çünki Çexiya hökuməti şəhərin UNESCO-nun siyahısına
salınması üçün
quruma müraciət etməyə hazırlaşır.
Karlovı Varı büllur
qabları və likörü ilə də tanınır
Karlovı Varı mağazalarının
çoxunda çex istehsalı olan büllur və farfor qab-qacaq satılır. Növbəti baş çəkdiyimiz məkan bu qabların
istehsal olunduğu
«Moser» kristal zavodu oldu. 1857-ci
ildə Lüdviq Moser
tərəfindən əsası
qoyulan zavodun məhsulları kral saraylarını bəzəyib.
Zavodun satış
meneceri Veronika Zvanorova bizə məlumat verir ki, Çexiyanın ən məşhur istehsal müəssisələrindən
biri olan «Moser»də hazırda 320 nəfər işçi çalışır. Zavodun girişində
burada istehsal olunan bir-birindən gözəl büllur və farfor qablardan ibarət muzey yaradılıb.
Burada eyni zamanda həmin
qabların satışı
da təşkil olunub. Ölkə daxilində müxtəlif
regionlarda, xüsusilə
turizm mərkəzlərində
satış mərkəzləri
olan zavodun Berlin, Paris,
Vyana, Madrid, Nyu-York və s. şəhərlərdə
ticarət nümayəndəlikləri
fəaliyyət göstərir.
Veronika Zvanorova deyir ki, 50 faiz
məhsulları Çexiyada
satılsa da, bunun çox hissəsinin alıcıları
turistlər olduğundan,
demək olar ki, «Moser» markalı qabların 90 faiz alıcısı əcnəbilərdir.
Zavodda istehsal prosesi ilə də yaxından tanış
oluruq. Potaş, kalsium, soda və
qumun qarışığından
ibarət büllur qabların hazır olana qədər hansı mərhələlərdən
keçməsini görmək
çox maraqlı idi. 1259 dərəcə
selsidə əridilən
qarışıq qəliblərə
tökülür. Sonra müxtəlif
formalı qablar soyuducularda soyudulur. Həmin qablar satışa çıxarılana qədər
bir neçə mərhələdən keçir.
Bu mərhələlərdə
qarışığın 60 faizi tullantı olur. Amma bu tullantılar
təkrar istehsala yönəldilir.
Zavodun məhsulları
arasında qadın bəzək əşyaları
da üstünlük təşkil edir. Bunlar həm
qiymətli daş-qaş
kimi, həm də suvenir formasında istehsal edilir.
Karlovı Varı «Dirilik suyu» adı ilə məşhur «Bexerovka» likörü ilə də tanınır. Bu, müalicəvi
otlardan hazırlanan tinkturadır. Tərkibi
spirt, mineral su, 20-yə
yaxın ot
və şəkərdən
ibarət olan, hazırlanma texnikası sirr saxlanılan likördən mədə
xəstəliklərinin müalicəsində
istifadə edilir.
Səfər çərçivəsində zavodun yaxınlığında
yerləşən eyniadlı
muzeyə də baş çəkirik. Burada «Bexerovka»
adı altında istehsal olunan bir neçə tərkibdə içkinin
dequstasiyası keçirilir.
Müəssisə rəhbərliyi üçün
hər bir turistin fikri maraqlıdır.
2006-cı ildə 200 illiyi
qeyd olunan likör vəba əleyhinə dərman vasitəsi kimi yaradılıb. Bu xəstəlik
Napoleon müharibələri dövründə Avropada çox geniş yayılmışdı. Karlovı Varıda
hazırlanmış möcüzəli
iksirə böyük
tələbat vardı.
Onu Avstriya və Fransa imperatorlarının
təbəələri alırdılar.
Likör
ən çox Prussiyaya və Almaniya krallıqlarına göndərilirdi.
«Bexerovka»nı əvvəlcə 50, 100 və
200 milliqramlıq şüşə
qablara doldururdular. Lakin tələbat sürətlə
artdığı üçün
artıq XIX əsrin
20-ci illərində onu
ancaq yarımlitrlik butulkalarda satmağa başladılar.
Hazırda likör dünyanın 35 ölkəsinə göndərilir. «Yan Bexer
- Karlovarskya Bexerovka» zavodu hər il 9 milyon
litr likör istehsal edir. Yaxın illərdə həmin göstəricinin artırılacağı
gözlənilir. Acıtəhər - tünd likör 20 qramlıq kiçik qablarda içilir. Çexlər deyirlər ki,
1 və 2-ci stəkan sağlığa, 3-cü əhval-ruhiyyəyə,
4-cü isə uğura
içirlər.
Marianskie
Laznedə əsasən
çexiyalılar dincəlir
Çexiyanın maraqlı və ikinci böyük kurort şəhərləri
Marianskie Laznedir. Karlovı Varının
48 kilometrliyində yerləşən
bu turizm mərkəzinə adətən
şəhərcik deyirlər.
Cəmi 14 min əhalisi
var, şəhərdə
4 orta məktəb, 6 uşaq bağçası,
4 gimnaziya fəaliyyət
göstərir. 100 mineral su mənbəyi olsa da, hazırda
onun 40-ı aktivdir.
Burada ilk
müalicəvi su
1528-ci ildə aşkarlanıb.
Sular yerin altından soyuq halda çıxır.
Onlardan qaraciyər, sidik yolları, əsəb və müxtəlif dəri xəstəliklərinin
müalicəsində istifadə
olunur.
Karlovı Varıdan fərqli olaraq Marianskie Laznedə əsasən Çexiya vətəndaşları
dincəlir. Burada 5 ulduzlu hotellərlə
yanaşı, 4, 3 ulduzlu
hotellər də çoxdur.
Şəhərdə tarixi XIX əsrin əvvəllərinə təsadüf
edən çoxlu binalar var. 1818-ci ildə
ilk dəfə olaraq bura kurort şəhəri
kimi tanınmağa başlanıb. Şəhərin mərkəzində musiqili fontan var. Hər saatın əvvəlində fontan qalxır və musiqi səslənir.
* * *
Nəhayət, səfərimizin 3-cü günü Çexiyanın
məşhur kurortları
ilə tanışlığımızı
başa çatdırıb
Avropanın qədim şəhərlərindən biri
olan Praqaya yola düşürük...
(ardı var)
Fəxriyyə Abdullayeva,
Bakı-Praqa-Bakı
Mədəniyyət.- 2014.- 29
oktyabr.- S. 10.