Xalq artisti Tamilla Mahmudova dünyasını dəyişib

Azərbaycanın Xalq artisti və Rusiyanın Əməkdar artisti, “Şöhrət” ordenli, Moskva Dövlət Pedaqoji Universitetinin musiqi fakültəsinin professoru, pianoçu Tamilla Mahmudova ömrünün 84-cü ilində dünyasını dəyişib.

Tamilla Mahmudova 1931-ci il aprelin 21-də Bakıda doğulub, ilk musiqi təhsilini Azərbaycan Dövlət Konservatoriyası nəzdində xüsusi məktəbdə, məşhur pedaqoq, professor Kövkəb Səfərəliyevanın sinfində alıb. Sonra Moskva Dövlət Konservatoriyasını və professor Y.Zakın sinfində aspiranturanı bitirib.

Rusiyada və xarici ölkələrdə dinləyicilər Tamilla Mahmudovanı geniş diapazonlu ifaçı kimi yaxşı tanıyırdılar. Onun repertuarına Qərbi Avropa və rus klassik bəstəkarlarının ən mürəkkəb, virtuoz əsərləri daxil idi. Azərbaycan bəstəkarları Ü.Hacıbəyli, Q.Qarayev, F.Əmirov, A.Məlikov və A.Sultanovanın musiqisi onun konsert proqramlarında həmişə xüsusi yer tuturdu. Qara Qarayevin fortepiano prelyüdləri silsiləsinin tam halda ifası pianoçunun böyük nailiyyəti olub.

Tamilla Mahmudova konsert fəaliyyəti ilə yanaşı, musiqi pedaqogikasında da böyük iz qoyub. Hazırda onun şagirdləri Rusiyanın və başqa ölkələrin bir sıra musiqi kollektivlərində və musiqi müəssisələrində çalışır.

Gözəl qələm sahibi olan Tamilla Mahmudova musiqi haqqında çoxsaylı maraqlı məqalələr, xatirələr kitabı yazıb.

Ömrünün çox hissəsini Moskvada yaşayan musiqiçi Rusiya musiqi sənətinin inkişafına töhfələr verib. Bununla belə, o, doğma Vətənlə əlaqəni heç vaxt kəsmir, tez-tez Azərbaycanda konsert proqramları ilə çıxış edirdi.

Mədəniyyət.- 2014.- 17 sentyabr.- S. 14.