Gəncədə Qafqaz İslam Ordusunun döyüş bayrağı tapılıb

Gəncə şəhərinin sakini Füzuli Hüseynov yaşadığı evin damında təmir işləri apararkən Qafqaz İslam Ordusunun döyüş bayrağını tapıb. O deyib ki, bayraq onun babası Əli Hüseynov tərəfindən qorunub saxlanılıb. 1918-ci ildə qardaş Türkiyə dövləti igid sərkərdə Nuru Paşanın rəhbərlik etdiyi ordunu Xalq Cümhuriyyətinə kömək etmək üçün Azərbaycana göndərir. Xilaskar ordu Gəncədən Bakıya zəfər yolu keçir.

Həmin dövrdə Gəncənin tanınmış vətənpərvər ziyalısı olan Əli Hüseynov Qafqaz İslam Ordusunun komandanı Nuru Paşa ilə dostluq əlaqələri qurur. Qafqaz İslam Ordusu öz missiyasını başa vuraraq vətənə qayıdarkən dostluğun rəmzi kimi Nuru Paşa döyüş bayrağını Əli Hüseynova hədiyyə edir.

Cümhuriyyətin süqutundan sonra Əli Hüseynov bayrağı qorumaq üçün Qurani-Kərimlə birlikdə bükərək, yaşadığı evin çardağında gizlədir. 1967-ci ildə o, dünyasını dəyişərkən həmin bayrağı qorumağı övladlarına vəsiyyət edir. Lakin övladları onun yerini tapa bilmirlər. Aradan xeyli keçdikdən sonra evin damı təmir olunarkən təsadüfən bayraq üzə çıxır. Bayrağın bir hissəsinin çürüməsinə baxmayaraq, Füzuli Hüseynov onu tarixi eksponat kimi Azərbaycan Milli Elmlər Akademiyasının Gəncə Bölməsinə təhvil verib.

Mədəniyyət.- 2014.- 10 yanvar.- S. 13.