Yaponiya telekanalında Azərbaycan haqqında veriliş

Yaponiyanın “TV Tokyo Corporation” televiziya kanalında Azərbaycan haqqında veriliş nümayiş olunub. Şirkətin çəkiliş qrupu ötən ilin oktyabrında ölkəmizə səfər edib. Verilişdə ölkəmizin tarixi, bugünkü inkişaf yolu, ulu öndər Heydər Əliyevin müstəqil Azərbaycan dövlətinin möhkəmləndirilməsində müstəsna xidmətlərindən söz açılır.

Qeyd olunur ki, ərazisinə görə Yaponiyanın Hokkaydo adasından bir qədər böyük olan Azərbaycan zəngin təbii ehtiyatlara malikdir. Paytaxt Bakı həm keçmişin, həm də müasir dövrün memarlıq nümunələri ilə diqqəti cəlb edir. Bakının müasir tikililəri sırasında “Alov qüllələri” kompleksi xüsusi qeyd olunur. Müəlliflər Bakının gecə mənzərələri, Dövlət Bayrağı Meydanı, televiziya qülləsi, paytaxtın gecə illüminasiyaları və digər müasir tikililər barədə də məlumat verirlər.

Bildirilir ki, Azərbaycan turizm üçün çox gözəl ölkədir. Verilişdə ölkəmizdə mövcud olan təbiət möcüzələri, o cümlədən nadir təbiət hadisəsi sayılan palçıq vulkanlarından bəhs olunur. Dörd min il yaşı olan “Yanar dağ” Dövlət Tarix-Mədəniyyət və Təbiət Qoruğu təbiət abidəsi haqqında danışılır.

Neftdən yalnız yanacaq kimi deyil, eyni zamanda müalicəvi məqsədlərlə istifadə edildiyi qeyd olunur, Naftalandakı sağlamlıq mərkəzində göstərilən tibbi xidmət, neft prosedurunun insan orqanizminə xoş təsiri barədə ətraflı məlumat verilir.

Verilişdə Azərbaycan mətbəxinin zənginliyi və tamı xüsusi olaraq qeyd edilir. Azərbaycanlı ailəsində qonaq olan çəkiliş qrupu xalqımızın qonaqpərvərliyi və mehribanlığını vurğulayır.

Ölkəmizdə Yaponiyaya böyük marağın olduğu, Azərbaycan Dillər Universitetində tələbələrin yapon dilini öyrəndiyi, burada “Yapon mərkəzi”nin fəaliyyət göstərdiyi bildirilir.

Mədəniyyət.- 2014.- 15 yanvar.- S. 16.