Bəstəkar Elmira Nəzirova vəfat edib

Tanınmış bəstəkar, Əməkdar incəsənət xadimi, professor Elmira Nəzirova yanvarın 23-də İsraildə vəfat edib. Bu barədə Azərbaycan Bəstəkarlar İttifaqından məlumat verilib.

Elmira Mirzərza qızı Nəzirova 1928-ci il noyabrın 30-da Bakıda doğulub. Üzeyir Hacıbəyli adına Azərbaycan Dövlət Konservatoriyasının fortepiano və bəstəkarlıq sinfini bitirib. Konservatoriyada fortepiano sinfində dərs deyib. 1953-cü ildən SSRİ Bəstəkarlar İttifaqının və Azərbaycan Bəstəkarlar İttifaqının üzvü olub. “Şərəf nişanı” ordeni ilə təltif edilib.

Bir sıra əsərlərin, o cümlədən simfonik orkestr üçün uvertüranın, fortepiano ilə orkestr üçün konsertlərin, skripka, violonçel və fortepiano üçün sonatanın, Azərbaycan xalq mahnıları və romanslar mövzusunda işləmələrin müəllifidir. Dahi bəstəkar Fikrət Əmirovla birlikdə yazdığı “Ərəb mövzusunda fortepiano üçün konsert” Azərbaycan musiqi mədəniyyətində böyük hadisə olub.

1990-cı ildən İsraildə yaşayan Elmira Nəzirova orada pedaqoji fəaliyyətlə məşğul olurdu. 2004-cü ildə Bakıda musiqiçinin 75 illik yubileyi təntənəli şəkildə qeyd edilmişdi.

Allah rəhmət eləsin.

Mədəniyyət.- 2013.- 24 yanvar.- S. 2.