Azərbaycan, Gürcüstan və Moldovada turizmin inkişafı

Azərbaycanlı alimin həmsədri olduğu regional layihə “Tempus” proqramının qalibi olub

Avropa İttifaqının “Tempus” proqramı (universitet fənləri üçün Trans-Avropa mobillik cədvəli) çərçivəsində azərbaycanlı alimin həmsədri olduğu birgə regional layihə qalib elan edilib.

Layihənin regional əlaqələndiricisi Azərbaycan Texniki Universiteti, həmmüəllifi texnika elmləri doktoru, professor Həsən Məmmədovdur.

Onun sözlərinə görə, Fransanın Grenobl Akademiyasının koordinatorluğu ilə “Gürcüstan, Azərbaycan və Moldovada turizm sənayesinin inkişafı üçün mehmanxana işinin menecmenti üzrə bakalavr-magistr hazırlığı” mövzusunda regional “Tempus” layihəsi qəbul olunub.

Layihədə regionu təmsil edən 3 ölkənin hər birindən 8 tərəfdaşın iştirakı nəzərdə tutulur. Ölkəmizdən Mədəniyyət və Turizm, Təhsil nazirlikləri, Azərbaycan Texniki Universiteti, Azərbaycan Turizm İnstitutu, Mingəçevir Turizm Kolleci, “Bakı Turizm Ekskursiya” MMC, “New Baku” mehmanxanası və Azərbaycan Texniki Universitetinin tələbə həmkarlar ittifaqı təşkilatı bu layihədə iştirak edirlər.

Layihənin regional və beynəlxalq tərəfdaşları Grenobl Akademiyası tərəfindən müəyyənləşdirilib. Artıq layihənin reallaşdırılmasına başlanılıb. Fransa, Almaniya və İtaliya universitetlərinin də bu layihədə iştirakı planlaşdırılır.

Mədəniyyət.- 2014.- 24 yanvar.- S. 3.