“Bakı Prosesi”nə həsr olunmuş təqdimat

Aprelin 3-də Azərbaycan Turizm və Menecment Universitetində (ATMU) “Bakı Prosesi” və Dünya Mədəniyyətlərarası Dialoq Forumuna həsr olunan təqdimat mərasimi keçirilib.

ATMU-nun rektoru, professor Cəfər Cəfərov tədbirin əhəmiyyətindən danışıb. Qeyd edib ki, indiyə qədər keçirilən iki forumda universitetin tələbələri fəal iştirak ediblər. Bu il mayın 18-19-da Bakıda III Dünya Mədəniyyətlərarası Dialoq Forumu gerçəkləşəcək.

Beynəlxalq münasibətlər sistemində mədəniyyətlərarası dialoq və multikulturalizm kimi dəyərlərin təbliğində ölkəmizin əhəmiyyətli rolunu təsdiqləyən, UNESCO, BMT-nin Sivilizasiyalar Alyansı, Dünya Turizm Təşkilatı, Avropa Şurası və İSESCO-nun tərəfdaş olduğu mötəbər tədbirdə beş qitədən 800-dək nümayəndənin iştirakı nəzərdə tutulur.

Tədbirdə Mədəniyyət və Turizm Nazirliyi Beynəlxalq əməkdaşlıq şöbəsinin müdiri Vasif Eyvazzadə, Elm sektorunun müdiri Asif Usubəliyev forumun prioritetləri və Prezident İlham Əliyevin təşəbbüsü ilə həyata keçirilən “Bakı Prosesi” barədə təqdimatla çıxış ediblər. Sonra mövzu ətrafında geniş fikir mübadiləsi aparılıb.

Fəxriyyə Abdullayeva

Mədəniyyət.- 2015.- 8 aprel.- S. 9.