Xalça Muzeyi ilə tanışlıq britaniyalı qonaqda zəngin təəssürat yaradıb

Viktoriya və Albert Muzeyinin direktoru Martin Rot aprelin 9-da Azərbaycan Xalça Muzeyində olub. Qonağa məlumat verilib ki, xalçaçılıq sənətinin əsas bədii istiqamətlərini əks etdirən muzey ekspozisiyası xalçalara məxsus unikal gözəlliyin, materialın, yaradılma texnikasının, nəfis və dərin bədii xüsusiyyətlərin harmoniyasını nümayiş etdirir. Muzeyin “qızıl fondu”nu xovlu xalçalar təşkil edir. Burada Azərbaycanın 7 əsas xalçaçılıq məktəbi - Quba, Bakı, Şirvan, Gəncə, Qazax, Qarabağ və Təbriz xalçaçılıq məktəbləri təmsil olunub. Xalçalar insan, heyvan, quş təsvirləri ilə, bitki ornamentləri və xalqın həyatını əks etdirən süjetli motivlərlə bəzədilib. Qeyd edilib ki, muzeyin kolleksiyasında xovsuz xalçaların nadir nümunələri də təmsil olunub.

Qonağa bildirilib ki, Azərbaycanın birinci xanımı, Heydər Əliyev Fondunun prezidenti Mehriban Əliyevanın böyük əməyi sayəsində 2010-cu ildə milli xalçaçılıq sənəti UNESCO-nun qeyri-maddi mədəni irs siyahısına daxil edilib.

Muzeydə quraşdırılmış xüsusi monitorda dünya kolleksiyalarındakı Azərbaycan xalçaları, Avropa sənətkarlarının əsərlərində onların əks etdirilməsi nümayiş olunur. Burada Viktoriya və Albert Muzeyinin kolleksiyasında saxlanılan məşhur “Şeyx Səfi” xalçasının reproduksiyası da var. Muzeyin ekspozisiyasında nümayiş etdirilən və ehtiyat fondlarında saxlanılan xalçalar arasında XVII, XVIII, XIX və XX əsrlərdə yaradılmış məşhur kompozisiyaları görmək olar.

Azərbaycan Xalça Muzeyi qonaqda böyük təəssürat oyadıb. Martin Rot “Rəy kitabı”na ürək sözlərini yazıb. Muzeyin direktoru Röya Tağıyeva Martin Rota xatirə hədiyyələri təqdim edib.

Mədəniyyət.- 2015.- 10 aprel.- S. 3.