Azərbaycan kitabları London sərgisində

Aprelin 14-dən 16-dək Londonda növbəti beynəlxalq kitab sərgisi keçirilib. Mədəniyyət və Turizm Nazirliyinin təşkilatçılığı, Böyük Britaniyadakı səfirliyimizin və Azərbaycan Mədəniyyətlərarası Cəmiyyətinin dəstəyi ilə sərgidə ölkəmiz də təmsil olunub.

Sərgi ekspozisiyasında Qız qalasının təsviri olan 40 kvadratmetrlik sahədə qurulmuş stendimiz xüsusi tərtibatı ilə diqqət çəkib. Burada Heydər Əliyev Fondunun, Mədəniyyət və Turizm Nazirliyinin, Azərbaycan Tərcümə Mərkəzinin, “Qələm”, “Radius”, “Altun kitab” nəşriyyatlarının nəşrləri, ölkəmizin tarixinə, mədəniyyətinə, ədəbiyyatına, turizm imkanlarına, Qarabağa həsr edilmiş kitab və reklam-çap məhsulları nümayiş olunub. Maraqlananlara ölkəmizin coğrafi mövqeyi, mədəniyyəti, tarixi, tolerantlıq ənənələri, turizm imkanları, Azərbaycanın ev sahibliyi edəcəyi I Avropa Oyunları, bu il keçiriləcək IV Bakı Beynəlxalq Kitab Sərgi-Yarmarkası haqqında məlumat verilib, kitablar hədiyyə edilib.

Stendə quraşdırılmış monitorda Azərbaycanın gözəl guşələrini, əsrarəngiz təbiətini, unikal tarixi və memarlıq abidələrini əks etdirən videoçarxlar nümayiş etdirilir.

Stenddə Azərbaycanın mədəniyyət himayədarı, Heydər Əliyev Fondunun prezidenti UNESCO və İSESCO-nun xoşməramlı səfiri Mehriban Əliyevanın xidmətlərindən bəhs edən nəşrlərə də xüsusi yer ayrılıb.

Qeyd edək ki, sərgidə Mədəniyyət və Turizm Nazirliyi Kitab dövriyyəsi və nəşriyyatlar ilə iş şöbəsinin baş məsləhətçisi Aslan Cəfərov, M.F.Axundzadə adına Milli Kitabxananın direktoru Kərim Tahirov, Nazirlər Kabineti yanında Tərcümə Mərkəzinin direktoru Afaq Məsud, nəşriyyatların təmsilçiləri iştirak ediblər. Azərbaycan Respublikasının Böyük Britaniya və Şimali İrlandiya Birləşmiş Krallığında səfiri Tahir Tağızadə stendimizi ziyarət edib.

1971-ci ildən başlayaraq mütəmadi şəkildə hər il təşkil olunan London sərgisində bu il Avropa ölkələrindən, eləcə də ABŞ, Kanada, Yaponiya, Çin, Koreya Respublikası, Səudiyyə Ərəbistanı, Hindistan və Türkiyədən 500-ə yaxın dövlət və özəl nəşriyyatlar iştirak edib. Xatırladaq ki, Azərbaycan Respublikası Mədəniyyət və Turizm Nazirliyi 2009-cu ildən ölkəmizi London beynəlxalq kitab sərgisində təmsil edir.

Mədəniyyət.- 2015.- 17 aprel.- S. 17.