Özbəkistanla turizm sahəsində əməkdaşlıq müzakirə edilib

Azərbaycanın Özbəkistandakı səfiri Hüseyn Quliyev Özbəkturizm milli şirkətinin rəhbəri Fərrux Rzayevlə görüşüb. F.Rzayev turizm sahəsində əlaqələrin inkişafı istiqamətində görüləcək işlərdən danışıb.

Öz növbəsində səfir ölkələrimiz arasında çoxsahəli əməkdaşlığın inkişafından məmnun olduğunu bildirib. Söhbət zamanı turizm sahəsində birgə əməkdaşlığın dərinləşdirilməsi, beynəlxalq təşkilatlar çərçivəsində qarşılıqlı dəstək, turizmin müxtəlif sahələrinə dair birgə layihələrin həyata keçirilməsi və digər məsələlər müzakirə olunub.

Görüşdə Özbəkturizmin beynəlxalq əlaqələr şöbəsinin müdiri Diyor Pulatov, səfirliyin birinci katibi, Daşkənddəki Heydər Əliyev adına Azərbaycan Mədəniyyət Mərkəzinin direktoru Samir Abbasov iştirak ediblər.

Mədəniyyət.- 2015.- 17 aprel.- S. 9.