Muzey menecmenti üzrə treninqlər keçirilib

Britaniya Şurası ölkəmizdə incəsənət sahəsində yeni layihəyə başlayıb

 

Böyük Britaniyanın “British Council” (Britaniya Şurası) təşkilatı Azərbaycanda fəaliyyət göstərdiyi 20 ildən artıq müddətdə bir çox sahələrdə layihələr həyata keçirib. Bu layihələr sırasında incəsənət sahəsi də əsas istiqamətlərdən biridir.

 

22-23 aprel tarixində Azərbaycan Milli İncəsənət Muzeyində təşkilatın bu sahədə fəaliyyət planına əsasən muzey mütəxəssisləri üçün ilk təlimlər keçirildi. Böyük Britaniyadan dəvət olunmuş mütəxəssislərin iştirakı ilə keçirilən "Muzey menecmenti" layihəsi mədəni irsimizin qorunması sahəsində öz töhfəsini verəcək.

Tədbirdə “British Council”in Avropa regionu üzrə direktoru Maykl Börd, “British Council” təşkilatının Bakıdakı nümayəndəliyinin rəhbəri Elizabeth Vayt, Böyük Britaniyanın Azərbaycandakı səfirinin müavini Stefen MakKormik, mədəniyyət və turizm nazirinin müavini Sevda Məmmədəliyeva, Mədəniyyət və Turizm Nazirliyi Muzey işi sektorunun müdiri Azadə Hüseynova, Azərbaycan Milli İncəsənət Muzeyinin direktoru Çingiz Fərzəliyev iştirak ediblər.

Görüşdə çıxış edən nazir müavini Sevda Məmmədəliyeva bildirib ki, Britaniya Şurası Azərbaycanın muzeylərində çalışan mütəxəssislərin inkişafı və bu sahəyə ictimaiyyətin marağının artırılması üzrə uzunmüddətli layihə həyata keçirir. Britaniya Şurası ilə birgə teatr, musiqi, xoreoqrafiya, müasir incəsənət sahəsində bir çox maraqlı layihələr həyata keçirilib: “Böyük məmnuniyyətlə qeyd etmək istərdim ki, Britaniya Şurasının ölkəmizdəki fəaliyyəti Böyük Britaniya və Azərbaycan arasında dostluq əlaqələrinin daha da möhkəmlənməsinə, müxtəlif sahələrdə qarşılıqlı əməkdaşlığın uğurlu inkişafına xidmət edir. Əminəm ki, Britaniya Şurasının Avropa regionu üzrə direktoru Maykl Bördün Azərbaycana səfəri mədəni irsimizin qorunması sahəsində gələcək layihələrlə bağlı fəaliyyətə böyük töhfə verəcək və ölkələrimiz arasında mədəni əməkdaşlığın daha da inkişafına xidmət edəcəkdir”.

 

Mədəniyyət.- 2015.- 24 aprel.- S. 8.