Naxçıvanın Duzdağı - Azərbaycan möcüzəsi

Özbəkistan saytında məqalə dərc olunub

Ölkəmizin Özbəkistandakı səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzinin təşəbbüsü ilə bu ölkənin podrobno.uz saytında “Naxçıvanın Duzdağı - dünyada analoqu olmayan Azərbaycan möcüzəsidir” adlı məqalə dərc olunub.

Məqalədə qeyd edilir ki, Azərbaycanın Naxçıvan Muxtar Respublikasında, dəniz səviyyəsindən 1173 metr hündürlükdə yerləşən duz mağaraları dünyada tənəffüs orqanlarının xəstəliklərini uğurlu müalicə edən məkandır. Bildirilir ki, XX əsrin ortalarından başlayaraq allergik xəstəliklərin sayının artması dünyada həkimləri ciddi narahat etməyə başlayıb. Uzun axtarışlardan sonra aşkar edilib ki, duz şaxtalarında bu cür xəstəliklərin müalicəsi mümkündür. Naxçıvanda yerin 300 metr dərinliyində olan duz mədənləri insanlara əsl şəfa verir.

Məqalədə "Duzdağ" hotelində, habelə müalicəxanada yaradılan şərait haqqında geniş məlumat verilib. Müəllif maraqlananları və turistləri bu möcüzəni öz gözləri ilə görmək üçün Naxçıvana dəvət edir. Məqalədə Naxçıvanın mineral və müalicəvi sularla zəngin olduğu və bu mövzuya da gələcəkdə müraciət ediləcəyi qeyd olunur.

Mədəniyyət.- 2015.- 24 aprel.- S. 8.