Qəbələ tarixinin açılmamış səhifələri

Qafqaz Albaniyasının paytaxtı olan qədim Qəbələ şəhərinin ərazisində aparılan arxeoloji qazıntı işləri uğurla davam etdirilir. Rayonun Çuxur Qəbələ kəndi ərazisində yerləşən qədim Qəbələ şəhərinin xarabalığında Azərbaycan-Koreya Mədəniyyət Mübadiləsi Assosiasiyasının (SEBA) dəstəyi ilə AMEA-nın Arxeologiya və Etnoqrafiya İnstitutunun Qəbələ arxeoloji ekspedisiyası və Koreya Respublikasının arxeoloqları tərəfindən birgə aparılan qazıntı işləri 3 ərazidə həyata keçirilir.

Arxeoloji qazıntılar əsasən Qəbələnin antik şəhər yeri, Səlbir və Qala ərazilərində aparılır. Arxeologiya və Etnoqrafiya İnstitutunun antik dövr arxeologiyası şöbəsinin müdiri, AMEA-nın müxbir üzvü, tarix elmləri doktoru, professor İlyas Babayevin rəhbərliyi ilə aparılan tədqiqat işləri zamanı yeni maddi mədəniyyət nümunələri aşkar edilib.

İlyas Babayevin sözlərinə görə, tədqiqatlar zamanı qədim Qafqaz Albaniyasına məxsus taxıl anbarları, ilk dəmir dövrünə aid materiallar və kurqanlar, eləcə də qədim insanların məişət həyatını əks etdirən saxsı və şüşə qablar, mis pullar, ox ucluqları, sümükdən və şüşədən hazırlanmış bəzək əşyaları aşkarlanıb. Yeni eksponatlar Qəbələ Arxeoloji Mərkəzində ən müasir texnologiyalarla təchiz edilən laboratoriyalarda bərpa olunduqdan sonra ekspozisiya zalına yerləşdiriləcək.

Hazırda qədim Qəbələnin antik şəhər yeri, Qala və Güllütəpə adlanan ərazilərində Seul Milli Universitetinin arxeologiya və incəsənət tarixi kafedrasının müdiri Kim Con Kilin rəhbərlik etdiyi arxeoloji qrupun 6 üzvünün və yerli mütəxəssislərin birgə iştirakı ilə qazıntı işləri davam etdirilir.

Qəbələnin zəngin tarixinin üzə çıxarılmasında son illər Azərbaycan-Koreya Mədəniyyət Mübadiləsi Assosiasiyasının (SEBA) gördüyü işlər mühüm yer tutur. Azərbaycanlı alimlərin koreyalı mütəxəssislərlə birgə apardıqları arxeoloji tədqiqatlar nəticəsində Qəbələ tarixinin açılmamış yeni səhifələri ortaya çıxıb. 2005-ci ildən bəri Qəbələdə aparılan ardıcıl arxeoloji qazıntılar zamanı əldə olunan maddi mədəniyyət nümunələri Çuxur Qəbələ kəndində yerləşən Qəbələ Arxeoloji Mərkəzində mühafizə olunur.

Mədəniyyət.- 2015.- 7 avqust.- S. 15.