Coğrafiya, mədəniyyət və dünyanın gələcəyi

Moskva Dövlət Universitetində (MDU) “Coğrafiya, mədəniyyət və cəmiyyət dünyanın gələcəyi üçün” mövzusunda regional konfrans keçirilir. Tədbirdə AMEA-nın akademik H.Əliyev adına Coğrafiya İnstitutunun direktoru, akademik Ramiz Məmmədov və direktorun elmi işlər üzrə müavini, AMEA-nın müxbir üzvü Elbrus Əlizadə iştirak edirlər.

170 illiyini qeyd edən Rusiya Coğrafiya Cəmiyyəti, Beynəlxalq Coğrafiya İttifaqı, Moskva Dövlət Universiteti və Rusiya Elmlər Akademiyası tərəfindən təşkil olunmuş konfransa 60 ölkədən 1500-dən artıq alim və mütəxəssis qatılıb.

Səmərəli müzakirələr, plenar və tematik mühazirələr, elmi ekskursiyalarla davam edən konfrans avqustun 21-də yekunlaşacaq.

Tədbir çərçivəsində Beynəlxalq Coğrafiya İttifaqının Ali Şurası akademik Ramiz Məmmədovun təqdimatından sonra 2017-ci ildə Bakıda 300-dən artıq xarici mütəxəssisin iştirakı ilə “Enerji coğrafiyası və tarazlı inkişaf” mövzusunda tematik beynəlxalq konfransın keçirilməsi barədə qərar qəbul olunub.

Mədəniyyət.- 2015.- 21 avqust.- S. 2.