Ölkəmiz Macarıstanda və Braziliyada xeyriyyə yarmarkalarında təmsil olunub

Macarıstanda akkreditə olunmuş diplomatların xanımlarının təmsil olunduğu təşkilatın təşəbbüsü ilə Yeni il qabağı sayca beşinci xeyriyyə yarmarkası təşkil edilib.

Macar ictimaiyyətinin böyük maraq göstərdiyi tədbir ölkə Prezidentinin xanımı Anita Herseqin himayədarlığı ilə keçirilib. Tədbirdə 40-dan çox ölkənin səfirlikləri, müxtəlif mədəniyyət mərkəzləri və digər qurumlar iştirak ediblər.

Azərbaycanın Macarıstandakı səfirliyi bu il də tədbirə qatılıb. Səfirin xanımı Şəhla Vəzirovanın, diplomat xanımlarının və Budapeştdəki Azərbaycan icması təmsilçilərinin fəal iştirakı ilə Azərbaycan milli mətbəxinin, tətbiqi-dekorativ sənət nümunələrinin xeyriyyə məqsədilə satışı və tanıdılması təşkil edilib.

Modelyer-dizayner Leyla Cəbrayılqızının Azərbaycan qadın milli geyimlərindən ibarət kolleksiyası milli musiqimizin sədaları altında tamaşaçılara təqdim edilib və böyük rəğbətlə qarşılanıb. Nümayişi izləyən və xoş təəssüratlarını dilə gətirən Macarıstan Prezidentinin xanımı Azərbaycan stendi ilə yaxından tanış olub.

Yarmarkada müxtəlif ölkələrin səfirlikləri tərəfindən satışa çıxarılan suvenir və milli mətbəx nümunələrinin satışından əldə edilən vəsait yardım fondlarına köçürülüb.

* * *

Braziliyada isə bu ölkədə fəaliyyət göstərən səfirliklərin iştirakı ilə 11-ci beynəlxalq xeyriyyə sərgisi təşkil edilib. Tədbirdə ölkəmiz də təmsil olunub.

Səfirlikdən bildiriblər ki, federal əyalətin qubernatoru Rodriqo Rollemberq sərginin təşkilinə görə bir sıra ölkələrin, o cümlədən Azərbaycanın Braziliyadakı səfirliyinə xüsusi təşəkkürünü bildirib. Sərgidə ölkəmizə məxsus suvenirlər, xalçalar, habelə milli mətbəximizin nümunələri iştirakçılara təqdim olunub. Azərbaycanın tarixi, mədəniyyəti və turizm imkanları barədə materiallar iştirakçılara paylanılıb və yerli mətbuat orqanlarına məlumat verilib. Azərbaycan stendi tədbir iştirakçılarının böyük marağına səbəb olub.

Mədəniyyət.- 2015.- 4 dekabr.- S. 9.