Daşkənddə Azərbaycan və özbək milli geyimləri nümayiş etdirilib

Daşkənddə Azərbaycan və özbək milli geyimlərinin təqdimatı keçirilib. Tədbir ölkəmizin Özbəkistandakı səfirliyi və onun nəzdindəki Heydər Əliyev adına Azərbaycan Mədəniyyət Mərkəzi, Azərbaycan Dövlət Rəsm Qalereyası, Bakıdakı Milli Geyim Evi və Daşkənddəki Kəmaləddin Behzod adına Rəssamlıq və Dizayn İnstitutunun birgə əməkdaşlığı nəticəsində reallaşıb.

Mədəniyyət mərkəzində keçirilən tədbirdə Azərbaycanın Qarabağ, Şirvan, Gəncə, Naxçıvan və ölkəmizin digər bölgələrinə dair geyimlər təqdim olunub. Daşkənddəki "Zarkaynar" Milli Libaslar Evinin təqdim etdiyi və özündə milli koloriti əks etdirən xüsusi kolleksiyalar da göstərilib.

Azərbaycan Mədəniyyət Mərkəzinin direktoru Samir Abbasov, Azərbaycan Dövlət Rəsm Qalereyasının direktoru Elnur Hüseynov və başqaları çıxış edərək milli geyimlərin hər iki xalqın tarixinin, mədəniyyətinin göstəricisi olduğunu bildirib, Azərbaycan və özbək xalqlarının zəngin geyim mədəniyyəti haqqında söhbət açıblar.

Azərbaycan milli geyimləri Bakıdakı Milli Geyim Evinin, özbək geyimləri isə Daşkənddəki Kəmaləddin Behzod adına Rəssamlıq və Dizayn İnstitutunun kolleksiyaları əsasında təqdim olunub. Paltarları institutun tələbələri nümayiş etdirib.

Sərginin sonunda milli geyimli oğlan və qızın Azərbaycan və Özbəkistan bayraqlarını səhnəyə gətirməsi tamaşaçıların alqışları ilə qarşılanıb.

Mədəniyyət.- 2015.- 18 dekabr.- S. 16.