Ankarada TÜRKSOY-un “Haldun Taner ili”nin açılışı

1993-cü ildən zəngin türk mədəniyyətinin təbliği və tanıdılması yolunda geniş fəaliyyət göstərən TÜRKSOY təşkilatının ənənəvi layihələrindən biri də türk dünyasının görkəmli mədəniyyət, ədəbiyyat, incəsənət xadimlərinin şərəfinə xatirə ilinin keçirilməsidir.

Təşkilat 2012-ci ili böyük Azərbaycan mütəfəkkiri və dramaturqu Mirzə Fətəli Axundzadəyə, 2013-cü ili tanınmış qazax bəstəkarı və dirijoru Mukan Tölebayevə, 2014-cü ili böyük türkmən şairi Məhdumqulu Fərqai və qırğız ozanı Toktoqul Satılqanova ithaf etmişdi.

Ötən ilin noyabrında Tatarıstanın paytaxtı Kazanda gerçəkləşdirilən TÜRKSOY Daimi Şurası 32-ci dönəm toplantısında 2015-ci il ünlü türk dramaturqu Haldun Tanerin 100 illiyi və xakas xalq dastançısı Semen Kadışevin 130 illiyi münasibətilə bu şəxsiyyətlərin xatirə ili elan olunub.

Fevralın 24-də Ankara Opera Teatrında TÜRKSOY-un “Haldun Taner ili”nin açılışına həsr olunmuş təntənəli mərasim keçiriləcək. Mərasimə TÜRKSOY-un baş katibi Düsen Kaseinov, Türkiyənin mədəniyyət və turizm naziri Ömər Çelik, türk respublikalarının nümayəndələri qatılacaq.

Bu il anadan olmasının 100 illiyi qeyd edilən Haldun Taner Türkiyənin tanınmış yazıçı-dramaturqu və jurnalisti olub. Yazıçılıqla yanaşı, İstanbul Universiteti Qəzetçilik İnstitutunda, Ankara Universiteti dil, tarix, coğrafiya fakültəsində, İstanbul Universiteti ədəbiyyat fakültəsində ədəbiyyat, incəsənət tarixi və teatr dərsləri verən Haldun Taner “Milliyət” qəzetində redaktor işləyib, 1986-cı ildə İstanbulda vəfat edib.

Tədbirin bədii hissəsində Ankara Dövlət Teatrı və Samsun Dövlət Opera və Balet Teatrının təqdimatında Haldun Tanerin əsərlərindən parçalar nümayiş etdiriləcək. Həmçinin sənətçinin əsərlərinin yer aldığı sərgi düzənlənəcək.

Tədbir çərçivəsində ənənəvi olaraq türk mədəniyyət və sənətinin yaşadılmasına töhfə verən media nümayəndələrinə də TÜRKSOY-un mükafatları təqdim ediləcək.

Mehparə Sultanova

Mədəniyyət.- 2015.- 20 fevral.- S. 9.