Belarus Prezidenti Polad Bülbüloğlunu mükafatlandırıb

Xəbər verdiyimiz kimi, iyulun 9-dan 13-dək Belarusun Vitebsk şəhərində “Slavyan bazarı” XXIV Beynəlxalq İncəsənət Festivalı keçirilib. Festivalda estrada mahnı müsabiqəsinin münsiflər heyətinə görkəmli müğənni və bəstəkar, Azərbaycanın Rusiyadakı səfiri, Xalq artisti Polad Bülbüloğlu rəhbərlik edib.

Festivalın bağlanış mərasimində Belarus Prezidenti Aleksandr Lukaşenko “İncəsənət vasitəsilə sülhə və qarşılıqlı anlaşmaya doğru” xüsusi mükafatını Polad Bülbüloğluna təqdim edib.

Sənətkar dövlət başçısına təşəkkür edərək mükafatı şəxsi töhfəsi kimi deyil, Belarus ilə Azərbaycan arasında dostluq münasibətlərinin inkişafına diqqətin nümunəsi kimi dəyərləndirib. O həmçinin Vitebskdə keçirilən möhtəşəm musiqi və incəsənət bayramına görə bütün iştirakçılar adından Belarus rəhbərliyinə minnətdarlığını bildirib.

Mədəniyyət.-2015.- 17 iyul.- S.4.