Hotellərin qiymətləri ilə bağlı qərar və tövsiyələr veriləcək

 

Nazirlər Kabinetinin 2015-ci ilin 6 ayının sosial-iqtisadi inkişafının yekunlarına həsr olunan iclasında Prezident İlham Əliyevin verdiyi tapşırıqların icrası istiqamətində Mədəniyyət və Turizm Nazirliyi tərəfindən konkret işlər görülür.

Bu fikirləri mədəniyyət və turizm naziri Əbülfəs Qarayev Oğuzda keçirilən vətəndaş qəbulundan sonra jurnalistlərə açıqlamasında bildirib.

Nazir deyib: Biz bu işlərin üç istiqamət üzrə aparılmasını nəzərdə tuturuq. Sözsüz ki, bu istiqamətlər özlüyündə daha geniş spektrdə əhatə olunacaq. Birinci istiqamət Azərbaycana xaricdən gələnlərin vizalarının verilməsi qaydalarının təkmilləşdirilməsi ilə bağlıdır. Bu gün Azərbaycanda 50-yə yaxın şirkət elektron vizaların verilməsi ilə məşğuldur. Yalnız bu il müddətində 10 minədək viza verilib. Ancaq dövlətimizin başçısının tapşırığının əsas məqsədi vizaların daha çevik, daha səmərəli və rahat alınması üçün şəraitin yaradılmasından ibarətdir. Ona görə də vizanın verilmə müddətinin aşağı salınması, yəni 10 gündən 3-5 günədək azaldılması məsələsi gündəmdədir. Artıq Xarici İşlər Nazirliyi digər dövlət qurumları ilə birlikdə təkliflər və qərar layihələri hazırlayır. Ümidvaram ki, Nazirlər Kabineti tərəfindən təsdiq olunmuş qaydalar üzrə akkreditasiya yenidən aparılacaq. Turizm şirkətlərinin bu qaydalara tam riayət etmələrinə ciddi nəzarət olunmalıdır. Onların vasitəsilə bu vizaların alınması və bəlkə də xüsusi mərkəzlərin yaradılması mövzusu bu gün gündəlikdədir.

Əbülfəs Qarayev bildirib ki, ikinci istiqamət üzrə nazirliyin üzərinə düşən vəzifə bölgələrdə yerləşən hotellərin fəaliyyəti ilə bağlıdır: Biz hər mövsüm hotellərlə bağlı monitorinqlər aparırıq. Bu monitorinqlər konkret olaraq həm keyfiyyət, həm də qiymət baxımından tam aydın mənzərəni bizə göstərəcək. Regionlarda mövcud olan bütün hotellərin qiymət siyasətinə yenidən baxılması tövsiyə olunub. Artıq rayon icra hakimiyyətlərinin rəhbərlərinə, yerli sahibkarlara, müxtəlif qurumlara tövsiyə edilib ki, regionlarda yeni tikilən hotellər və yaxud turizmin inkişafı ilə bağlı atılan hər hansı bir addım mütləq nazirlikdə mövcud standartlara uyğunlaşdırılmalıdır. Bu gün qanunvericilikdə mütləq standartlaşma məsələsi yoxdur. Biz hesab edirik ki, bu gün hər hansı bir hotelin, motelin, qonaq evinin tikintisi zamanı sahibkar mütləq onun standartlarını Mədəniyyət və Turizm Nazirliyi ilə birgə müəyyənləşdirməlidir. Çünki bu standartlar həm də qiymətlərin tənzimlənməsinə ciddi təsir göstərəcək. Yalandan yazırlar ki, hotel üçya dördulduzludur. Ancaq real olaraq bu hotellərin standartları təqdim edilən xidmətlərin standartlarına heç cür uyğun gəlmir. Ona görə də biz artıq tələb edəcəyik ki, qiymətlər qanunvericilik çərçivəsində standartlara uyğunlaşdırılsın. Düşünürəm ki, bununla xidmətlərin keyfiyyətinin müvafiq qiymətə münasib olmasını təmin edə bilərik. Sözsüz ki, bu, bir-iki günün məsələsi deyil. Bu mövsümdə bizə tam mənzərə aydın olacaqbiz bütün təhlilləri aparıb, yaxın vaxtlarda qiymətlərin daha məntiqli olması barədə öz qərarımızı və tövsiyələrimizi verəcəyik.

Əbülfəs Qarayev bildirib ki, üçüncü istiqamət nazirliyin üzərinə düşür. Nazirlik regionlarda turizm xidmətlərinin səviyyəsinin, onların çeşidliyinin, müxtəlifliyinin, mədəni xidmətlərin səviyyəsinin artırılması, gələcək turistlərin daha aktiv istirahətinin təşkilinə dair tövsiyələr hazırlayır.

 

Mədəniyyət.-2015.- 17 iyul.- S.7.