Media Kəndində yerli və əcnəbi jurnalistlər üçün əyləncəli gecə

İyunun 10-da “Bakı-2015” birinci Avropa Oyunlarının Media kəndində yerli və əcnəbi jurnalistlər üçün əyləncəli gecə təşkil olunub. 800-dən artıq jurnalistin qatıldığı tədbirdə Azərbaycanın milli musiqi aləti olan tarın və Avropa musiqi alətlərinin ifasında səsləndirilən könül oxşayan musiqi parçaları xarici jurnalistlər tərəfindən hərarətli alqışlarla qarşılanıb. “Bakı-2015” Əməliyyat Komitəsinin mətbuat əməliyyatları şöbəsinin direktoru Ceyn Pirs birinci Avropa Oyunlarını işıqlandıracaq jurnalistləri salamlayaraq onlara uğurlar arzulayıb.

Gecədə Azərbaycanın milli musiqiləri, o cümlədən “Sarı gəlin” və digər mahnılar səsləndirilib. Maraqlı məqamlardan biri də yerli və xarici jurnalistlərin “Yallı” rəqsini birgə ifa etmələri olub. Sonra əyləncə gecəsi öz ahəngi ilə davam edib.

Mədəniyyət.- 2015.- 12 iyun.- S. 8.