Misir Mədəniyyət Mərkəzi əməkdaşlığı genişləndirir

Misir Ərəb Respublikasının Azərbaycandakı səfirliyinin Mədəniyyət Mərkəzi ölkəmizin elm və mədəniyyət təşkilatları, ictimai qurumlarla əlaqələrini genişləndirir. Bugünlərdə Azərbaycan Milli Elmlər Akademiyası (AMEA) Folklor İnstitutunun direktoru Muxtar İmanov və professor Əli Şamil Misir Mədəniyyət Mərkəzində olublar.

Mərkəzin müdiri Əhməd Sami Elaydi qonaqlara rəhbərlik etdiyi qurumun fəaliyyətindən danışıb. Söhbət zamanı AMEA Folklor İnstitutu Misirin aidiyyəti qurumları ilə əməkdaşlıq müqavilələrinin bağlanılması, Misirdə nəşr olunan folklor haqqında kitabların Azərbaycan dilinə, Azərbaycan folkloru haqqında kitabların ərəb dilinə tərcümə olunması, Folklor İnstitutunun əməkdaşlarının Misir Mədəniyyət Mərkəzində tədris olunan ərəb dili kurslarında iştirakı barədə fikir mübadiləsi aparılıb.

Həmçinin Misir arxivlərində Azərbaycanla bağlı əlyazmaların nüsxələrinin əldə olunması və “Kitabi-Dədə Qorqud”un alman dilində ilk tərcüməsi və nəşrinin 200 illiyi haqqında Azərbaycan Prezidentinin sərəncamına uyğun olaraq müştərək tədbirlərin keçirilməsi haqqında təkliflər müzakirə olunub.

* * *

Misir Mədəniyyət Mərkəzində Beynəlxalq Avrasiya Mətbuat Fondunun sədri Umud Rəhimoğlu ilə də tanışlıq görüşü keçirilib. Mərkəzin müdiri Əhməd Sami Elaydi qonağa öz fəaliyyətləri, həyata keçirilən layihələr barədə məlumat verib. Azərbaycandakı ərəb səfirlikləri ilə birgə görüşlərin, mətbuat nümayəndələrinin qarşılıqlı səfərlərinin təşkilinin əhəmiyyəti vurğulanıb. Azərbaycan həqiqətlərini əks etdirən məlumatların, nəşrlərin ərəb dilinə tərcümə olunaraq ərəb dünyasına çatdırılması və bir sıra təkliflər müzakirə olunub.

Mədəniyyət.- 2015.- 17 iyun.- S. 15.