Özbəkistan saytında “Xarı bülbül” festivalı yada salınıb

Özbəkistanın uchildiz.uz saytında ölkəmizin Daşkənddəki səfirliyinin nəzdindəki Heydər Əliyev adına Azərbaycan Mədəniyyət Mərkəzinin direktoru Samir Abbasovun bir vaxtlar musiqi beşiyimiz Şuşada keçirilən “Xarı bülbül” festivalı haqqında məqaləsi dərc olunub.

Məqalədə müəllif dünyada yalnız Azərbaycanda - Qarabağda bitən “Xarı bülbül" çiçəyindən, festivalın tarixindən söz açır. Təəssüf hissi ilə qeyd olunur ki, 23 ildir davam edən işğal Qarabağda "Xarı bülbül" beynəlxalq musiqi festivalının keçirilməsinə imkan vermir və indi bu dağlarda musiqi sədaları deyil, başqa səslər ucalır. Müəllif işğala son qoyulacağına, Şuşada və digər azad olunmuş Azərbaycan şəhərlərində musiqi sədalarının yenidən yüksələcəyinə inandığını bildirir.

Mədəniyyət.- 2015.- 1 may.- S. 10.