Özbəkistan paytaxtında Azərbaycan mədəniyyətinin təqdimatı

Daşkənddə “Xalqların adət-ənənələri və milli yeməkləri” mövzusunda xeyriyyə festivalı keçirilib

Mayın 2-də Daşkəndə keçirilən "Xalqların adət-ənənələri və milli yeməkləri" mövzusunda xeyriyyə festivalına 50-dən çox səfirlik və diplomatik nümayəndəlik qatılıb. Səfirliklər öz xalqlarının adət-ənənələrini nümayiş etdirib, qonaqlara öz milli yeməklərini və şirniyyatlarını təklif ediblər.

Tədbirdə ölkəmizin Özbəkistandakı səfirliyi və səfirliyin nəzdindəki Heydər Əliyev adına Azərbaycan Mədəniyyət Mərkəzi iştirak edib. Qonaqlara milli xörəklərimiz - dolma, plov, dovğa, kükü, müxtəlif kabablar, həmçinin şirniyyatlarımızdan şəkərbura, paxlava və s. təklif olunub. Azərbaycan yeməklərinə festival iştirakçıları böyük maraq göstəriblər.

Tədbir çərçivəsində festivalın təşkilat komitəsinə, Özbəkistandakı xarici ölkələrin səfirlərinə Azərbaycan yeməkləri və şirniyyatlarından ziyafət verilib.

Azərbaycan üçün ayrılmış guşədə xalqımızın milli musiqi alətləri, suvenirlər və həmçinin milli məişət əşyaları nümayiş etdirilib. Guşədə ulu öndər Heydər Əliyevin həyat və fəaliyyəti ilə bağlı müxtəlif kitab və albomlar, Azərbaycanın tarixi, ədəbiyyatı, mədəniyyəti, milli mətbəxi ilə əlaqədar nəşrlər, Ermənistan-Azərbaycan, Dağlıq Qarabağ münaqişəsinə dair kitablar yer alıb.

Festival dünya xalqlarının mahnı və rəqslərindən ibarət konsert proqramı ilə davam edib. Azərbaycan Mədəniyyət Mərkəzinin nəzdindəki "Azərbaycan qızları" uşaq rəqs ansamblının üzvləri milli rəqslərimizi ifa ediblər.

Sonda festivalın münsiflər heyəti iştirakçıları mükafatlandırıb. Azərbaycanın Özbəkistandakı səfirliyi və Azərbaycan Mədəniyyət Mərkəzi xüsusi diploma layiq görülüb.

Qeyd edək ki, ötən həftə Orta Asiyanın nüfuzlu ali məktəblərindən olan Daşkənd İslam Universitetində yaradılan beynəlmiləl tələbə hərəkatı da ilk tədbirini Azərbaycana həsr edib. Tədbirə ölkəmizin Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzi və Özbəkistandakı diasporumuz təşkilati dəstək verib. Tədbirin bədii hissəsində Azərbaycan Mədəniyyət Mərkəzinin və Daşkənd İslam Universitetinin birgə hazırladığı musiqi nömrələri, rəqslər və səhnəciklər təqdim edilib.

Mədəniyyət.- 2015.- 6 may.- S. 16.