Mikayıl Müşfiqin xatirə muzeyi fəaliyyətini genişləndirəcək

Xızı rayonuna səfər zamanı mədəniyyət və turizm naziri Əbülfəs Qarayev görkəmli Azərbaycan şairi Mikayıl Müşfiqin rayonun Sayadlar kəndindəki xatirə muzeyini ziyarət edib. Nazir muzeyin hazırkı vəziyyəti ilə maraqlanıb, ekspozisiyalara baxıb.

Nazirə muzeydə keçirilən tədbirlər haqqında ətraflı məlumat verilib. Qeyd olunub ki, ölməz şairin xatirəsi bu bölgəyə səfər edən yerli və xarici vətəndaşlar tərəfindən hər zaman əziz tutulur, Müşfiq ocağına ziyarət heç vaxt azalmır.

Nazir həmçinin muzeyin iş şəraiti, əməkdaşların iş prosesi barədə də məlumatlandırılıb. Əbülfəs Qarayev muzeyin ərazisinin genişləndirilməsi, yeni inzibati otaqların tikilməsi üçün tədbirlər planının hazırlanması haqqında tapşırıqlar verib. Eyni zamanda, muzeyin ekspozisiyasında olan əsərlərin mühafizəsi ilə bağlı göstəriş verilib. Şairin irsinin geniş təbliğ olunması ilə bağlı müxtəlif dillərdə çap məhsullarının hazırlanması tövsiyə olunub.

Mədəniyyət.- 2015.- 27 may.- S. 3.