Azərbaycan əlyazmalarının minillik tarixi

Akademik Rafael Hüseynovun əsəri Böyük Britaniyada nəşr edilib

Görkəmli şərqşünas alim, filologiya elmləri doktoru, professor, AMEA-nın və Oksford Akademiya İttifaqının həqiqi üzvü Rafael Hüseynovun Böyük Britaniyada yeni əsəri nəşr edilib.

“Sokrat almanaxı” adlı ildə iki dəfə işıq üzü görən külliyyatda Rafael Hüseynovun “Orta əsrlər Azərbaycan əlyazmaları köhnəlməyən mədəniyyət və intellekt hadisəsi kimi” sərlövhəli araşdırması yer alıb. Həmçinin dünyanın bir sıra aparıcı alimləri ilə yanaşı, azərbaycanlı alim də şərqşünaslıq problemləri üzrə mötəbər ekspert olaraq “Sokrat almanaxı”nın redaksiya heyətinə daxil edilib.

Akademik Rafael Hüseynovun tədqiqatında Azərbaycan əlyazmalarının 1000 illik tarixi nəzərdən keçirilir. Müəllif şrift yığımı üsulu ilə ilk Azərbaycan kitabının 1818-ci ildə Təbrizdə nəşr edildiyini, bundan əvvəl isə 8-9 əsr ərzində ədəbiyyatımızın, elmimizin yalnız əlyazma kitabları vasitəsilə yayıldığını vurğulayır.

İrihəcmli, məxəzlərin dəyərli məlumatları əsasında qələmə alınmış araşdırmada orta əsr kitab mədəniyyətində miniatür sənətinin tutduğu mövqe və azərbaycanlı rəssamların həmin sahədə müstəsna fəaliyyətlərindən də geniş bəhs edilir.

Mədəniyyət.- 2015.- 2 sentyabr.- S. 2.