ABŞ-da Üzeyir
Hacıbəyliyə və Rəşid Behbudova
həsr olunmuş markalar
Azərbaycan klassik musiqisinin qurucusu, dahi bəstəkar Üzeyir Hacıbəylinin 130, vokal sənətimizin əvəzsiz təmsilçisi Rəşid Behbudovun isə 100 illik yubileyi ilə əlaqədar ABŞ-da xüsusi poçt markaları buraxılıb. Markaların buraxılması Azərbaycanın Los-Ancelesdəki baş konsulluğunun təşəbbüsü və dəstəyi ilə baş tutub.
ABŞ-ın Federal Poçt Xidməti tərəfindən təsdiq olunmuş və bütün ölkə ərazisində istifadə gücünə malik poçt markalarının üzərində hər iki musiqi xadiminin şəkilləri və "Üzeyir Hacıbəyli (1885-1948): Azərbaycan klassik musiqisinin banisi, 130 il", "Rəşid Behbudov (1915-1989): Əfsanəvi Azərbaycan müğənnisi, 100 il" sözləri yazılıb. Üzeyir Hacıbəyliyə həsr olunmuş markanın üzərində dahi bəstəkarın "Koroğlu" operasından notlar yerləşdirilib.
Qeyd edək ki,
bu, Azərbaycanın Los-Ancelesdəki baş konsulluğu tərəfindən
Üzeyir Hacıbəyli və Rəşid
Behbudov irsinin
tanıdılması məqsədilə həyata keçirilən
silsilə tədbirlərin tərkib hissəsidir. Kaliforniya ştatının Santa-Monika
şəhəri bəyannamə qəbul edərək,
sentyabrın 18-nin “Üzeyir Hacıbəyli
Günü” kimi qeyd olunacağını təsdiqləyib. Sentyabrın 19-da isə
"Arşın mal alan" filminin (1945) Hollivudda premyerası keçiriləcək.
Mədəniyyət.- 2015.- 18 sentyabr.- S. 2.