Miniatür Kitab Muzeyi “Ginnesin rekordlar kitabı”nda

“İçərişəhər” Tarix-Memarlıq Qoruğunun ərazisində yerləşən, dünyada ilk özəl Miniatür Kitab Muzeyi miniatür kitabların dünyada ən böyük kolleksiyası kimi “Ginnesin rekordlar kitabı”na daxil edilib.

Muzeyin təsisçisi və yaradıcısı, respublika “Kitab” cəmiyyətinin idarə heyətinin sədri, Əməkdar incəsənət xadimi Zərifə Salahova bildirib ki, 30 ildən artıq müddətdə formalaşmış kolleksiya bu gün də yeni nüsxələrlə zənginləşir.

Muzeydə dünyanın 66 ölkəsində nəşr edilmiş 5600-dən çox miniatür kitab sərgilənir. Z.Salahovanın sözlərinə görə, muzeyin “Ginnesin rekordlar kitabı”nda salınmasına nail olmaq üçün yarım ildən artıq gərgin iş görülüb. Muzeydə saxlanılan miniatür kitab nüsxələrindən 2913-ü bütün tələblərə tamamilə uyğun gəlir.

2015-ci il yanvarın 21-də “Ginnesin rekordlar kitabı”nın menecerlər komandasından alınan məlumata görə, muzeyin sifarişi qəbul edilib və o, miniatür kitabların dünyada ən böyük kolleksiyası hesab olunub. Yaxın vaxtlarda Z.Salahovaya “Guinness World Records” sertifikatı təqdim ediləcək.

Mədəniyyət.- 2015.- 23 yanvar.- S. 13.